Færði féð yfir á eigin reikning til að losa frysta reikninga

Árni Sæberg skrifar 11. nóvember 2025 11:58

Embætti Héraðssaksóknara hefur fært fjármuni, sem fjársvikarar höfðu af Landsbankanum og Arion banka vegna kerfisgalla hjá Reiknistofu bankanna, yfir á eigin reikning. Það var gert til þess að losa frysta reikninga fólks sem hafði fengið fjármunina lagða inn á þá af fjársvikurunum.

Þetta segir Ólafur Þór Hauksson héraðssaksóknari í samtali við Vísi. Rannsókn á þjófnaði umtalsverðra fjármuna af Landsbankanum og Arion banka færðist yfir til Héraðssaksóknara á fimmtudag í síðustu viku en málið var upphaflega tilkynnt til lögreglu laugardaginn 1. nóvember.

Ólafur Þór segir að unnið hafi verið hörðum höndum síðan á fimmtudag að rannsókn málsins og að færa fjármunina milli reikninga. Það hafi verið gert til þess að saklaust fólk, sem tók við fjármunum af fjársvikurunum og lenti því í því að reikningar þeirra voru frystir, gæti framfleytt sér.

Litáískur karlmaður sem seldi einum þeirra handteknu jeppa í þarsíðustu viku, sama dag og snjó kyngdi niður á höfuðborgarsvæðinu, lýsti því í samtali við fréttastofu að geta ekki framfleytt sér og fjölskyldu sinni þar sem reikningur hans hafi verið frystur.

Að öðru leyti segir Ólafur Þór rannsóknina vera í fullum gangi og því væri ekki ábyrgt af honum að upplýsa frekar um gang hennar.

Sviku milljónir af Landsbankanum Efnahagsbrot Landsbankinn Arion banki Lögreglumál

Tengdar fréttir

Gallinn varði í átta vikur og tveir komust úr landi

Héraðssaksóknari eltist við tvo karlmenn á erlendri grundu í tengslum við rannsókn á fjögur hundruð milljóna króna bankasvikum. Forstjóri Reiknistofu bankanna segist feginn að ekki hafi farið verr.

7. nóvember 2025 16:30

Þjófarnir lifðu eins og kóngar um stund

Karlmennirnir fimm sem sviku hundruð milljóna króna út úr Landsbankanum virðast fæstir hafa hugsað glæpinn til enda. En í skamma stund lifðu þeir sem kóngar, léku sér í spilavítum á netinu og keyptu sér flotta bíla.

6. nóvember 2025 13:33

Fleiri grunaðir en þeir sem voru handteknir

Fleiri eru grunaðir í fjársvikamáli gagnvart íslenskum bönkum en þeir fimm sem handteknir voru um helgina og málið teygir anga sína út fyrir landsteinana. Meðal þess sem fjármunabrotadeild lögreglunnar á höfuðborgarsvæðinu rannsakar er hvort svikin hafi verið skipulögð og hvort þau hafi staðið yfir í lengri tíma en fyrst var talið.

5. nóvember 2025 18:38