Ásmundarsalsfólk sektað en Bjarni kemur af fjöllum

Nadine Guðrún Yaghi og Snorri Másson skrifa 24. júní 2021 14:50

Dagbók lögreglunnar á aðfangadag 2020: „Lögregla var kölluð til vegna samkvæmis í sal í útleigu í miðbæ Reykjavíkur. Veitingarekstur er í salnum í flokki II og ætti því að vera lokaður á þessum tíma. Í ljós kom að 40-50 gestir voru samankomnir í salnum, þar á meðal einn háttvirtur ráðherra í ríkisstjórn Íslands.“ Stöð 2

Niðurstaða er komin í Ásmundarsalsmálið svonefnda frá því á Þorláksmessu í fyrra, þar sem hópur fólks gerðist uppvís að því að hafa farið fram yfir leyfilegan fjölda fólks á samkomum vegna sóttvarnatakmarkana.

Samkvæmt heimildum fréttastofu hefur hlutaðeigandi aðilum verið boðið að gangast undir það sem heitir lögreglustjórasátt, sem felst í að aðilum er boðið að greiða sekt innan tiltekins tímaramma.

Lögreglustjóri hefur heimild til að ljúka málum með sáttum af þessum toga þegar viðurlögin við brotinu eru innan ákveðinna marka.

Á þessari stundu er ekki ljóst hverjum verður gert að greiða sekt - hvort það verði aðeins rekstraraðilum eða einnig gestum.

Eins og þekkt er var Bjarni Benediktsson fjármála- og efnahagsráðherra staddur í salnum umrætt kvöld ásamt eiginkonu sinni.

Bjarni Benediktsson er formaður Sjálfstæðisflokksins.Vísir/Vilhelm

Bjarni segir í samtali við Vísi að hann hafi ekki haft veður af því að niðurstaða væri komin í málið. Hann kveðst enda ekki hafa verið til rannsóknar svo að hann vissi til. „Ég er ekki aðili að málinu,“ sagði Bjarni.

Ráðherra baðst á sínum tíma innilega afsökunar en sagðist á sínum tíma ekki hafa brotið sóttvarnalög með veru sinni á listaverkasýningu í salnum þetta kvöld. Hann sagði þó að rétt viðbrögð hefðu verið að yfirgefa listasafnið strax þegar fjölga fór í hópnum.

Í desember miðuðust almennar fjöldatakmarkanir við 10 manns en gestirnir í samkvæminu voru um 50. Um leið máttu veitingastaðir og barir aðeins vera opnir til 22 en lögreglan mætti á staðinn á ellefta tímanum eftir ábendingu um fjölmennt samkvæmi.

Samkvæmt svörum ákærusviðs lögreglunnar á höfuðborgarsvæðinu er niðurstaða komin í málið og hefur það verið afgreitt frá sviðinu. Frekari upplýsingar kvaðst sviðið ekki geta veitt vegna afgreiðslu einstakra mála.

Eigendur listasafnsins í Ásmundarsal hafa ekki veitt fréttastofu viðtal. Þeir báðust á sínum tíma afsökunar á að hafa „misst yfirsýn“ þegar leið á kvöldið og haft ekki stjórn á fjöldanum sem hóf að streyma inn upp úr hálfellefu.

Ráðherra í Ásmundarsal Lögreglumál Reykjavík

Tengdar fréttir

Telur símtöl Áslaugar Örnu ekki afskipti af rannsókn máls

Lögreglustjórinn á höfuðborgarsvæðinu segist ekki telja að Áslaug Arna Sigurbjörnsdóttir, dómsmálaráðherra, hafi haft afskipti af rannsókn sakamáls hjá embættinu með tveimur símtölum á aðfangadag þegar lögreglan greindi frá því að ráðherra hefði verið á meðal gesta á samkomu þar sem sóttvarnareglur voru brotnar.

4. mars 2021 19:53

Rannsókn lokið: Ásmundarsalarmálið sent ákærusviði

Lögregla hefur lokið rannsókn á mögulegum sóttvarnabrotum í Ásmundarsal á Þorláksmessu. Að sögn Jóhanns Karls Þórissonar aðstoðaryfirlögregluþjóns verður málið sent ákærusviði lögreglunnar í dag, ef það er ekki þegar komið þangað.

22. janúar 2021 10:22

Enginn sé betri en Bjarni í að koma sér úr vandræðum

Baldur Þórhallsson, prófessor í stjórmálafræði við Háskóla Íslands, telur að hér á landi sé enginn stjórnmálamaður betri í að koma sér út úr vandræðum en Bjarni Benediktsson, formaður Sjálfstæðisflokksins.

28. desember 2020 15:42

Mest lesið

Fleiri fréttir