Allra augu á þing­mönnum Sjálf­stæðis­flokks og VG

Augu margra verða á þingmönnum meirihlutans í dag, hvernig þeir haga atkvæðum sínum en þá verður kosið um frumvarp sem þingmenn flokka í minnihlutanum leggja fram um afglæpavæðingu vímuefna. Framsögumaður er Halldóra Mogensen en meðflutningsmenn eru Þórhildur Sunna Ævarsdóttir, Logi Einarsson, Helga Vala Helgadóttir, Andrés Ingi Jónsson, Ólafur Þór Gunnarsson, Þorsteinn Víglundsson, Jón Steindór Valdimarsson og Guðmundur Ingi Kristinsson.

Orðrómur um að meirihlutinn gangi úr skaftinu

Fyrir utan hið efnislega er þetta athyglisvert í flokkspólitísku samhengi, hvort flokkslínur á annarlegum forsendum ráði. Bæði Sjálfstæðisflokkur og VG hafa haft þetta mál á stefnuskrá sinni og þá er um þetta kveðið sérstaklega í stefnuskrá ríkisstjórnar Katrínar Jakobsdóttur: 

„Snúa þarf af braut harðra refsinga fyrir neyslu fíkniefna en styrkja aðgerðir gegn fíkniefnasölum, innflutningi og framleiðslu fíkniefna. Tryggja þarf fíklum viðunandi meðferðarúrræði með samvinnu dóms-, félags- og heilbrigðiskerfis,“

segir í stjórnarsáttmálanum.

Samkvæmt heimildum Vísis er þó uppi orðrómur um að stjórnarþingmenn hafi fengið tilskipun frá flokksráðum að greiða atkvæði gegn frumvarpinu; sú sé flokkslínan. Þó frumvarpið sé í dúr og moll við yfirlýsta stefnu ríkisstjórnarinnar.

Unnar Þór heitir maður sem hefur látið málið til sín taka á Twitter. Hann telur frumvarpið mikla bót, geti hreinlega reynst lífsbjörg fyrir marga þá sem eiga við fíkinefnavanda að etja og biðlar til þingmanna að veita því brautargengi. En hann er ekki bjartsýnn eftir að hafa sett sig í samband við þingheim og greinir frá því að svörin sem hann fái séu torkennileg.

Vísir ræddi við Jón Þór Ólafsson þingmann Pírata. Hann segir það rétt, að frekar sé gert ráð fyrir því en hitt, meðal þingmanna sem styðja málið að meirihlutinn muni leggjast gegn því. Þrátt fyrir að það sé í samræmi við stefnu flokkanna og stjórnarsáttmála.

Að leggjast gegn frumvarpinu svik við kjósendur

„Þingmenn þessara flokka virðist ekki vilja fylgja stefnu flokksins og samþykkt stjórnarsáttmálann, þó Píratar hafa fengið málið í atkvæðagreiðslu og gefið þeim dauðafæri.“

Jón Þór segist þannig ekki bjartsýnn á að málið nái fram að ganga. Ekki nema þeim megi ljóst verða að það kosti að svíkja kjósendur í þessu máli.

„Málið verður samþykkt ef VG og XD sitja hjá. Það verður fellt ef þeir kjósa á móti,“ segir Jón Þór. Spurður hvað þeir sem greiði atkvæði gegn því geti borið fyrir sig með þá afstöðu telur Jón Þór að það verði hugsanlega einhver moðreykur um að nú sé ekki rétti tíminn eða að þetta sé ekki rétta málið.

Rætt var við Jón Þór um þetta tiltekna mál í Bítinu í morgun.