Íslendingur í New York segir mótmælin hluta af tímabærri samfélagslegri byltingu

Dauði hins 46-ára gamla George Floyd sem lét lífið eftir afskipti lögreglunnar í Minneapolis hefur hrundið af stað mótmælaöldu um gervöll Bandaríkin og hafa samstöðumótmæli verið haldin víða um heiminn. 

Íslendingur sem búsett er í New York segir mótmælin þar í borg hafa farið friðsamlega fram og segist skilja vel viðbrögð svartra Bandaríkjamanna.

Kolbrún Ýrr Rolandsdóttir hefur verið búsett í New York, borginni sem aldrei sefur, frá árinu 2013. Hún segir mótmælin hluta af samfélagslegri byltingu sem sé orðin tímabær. Haldin séu mótmæli í öllum hverfum borgarinnar sem enn glímir við faraldur kórónuveirunnar. Kolbrún hafði áætlað að taka þátt í mótmælum við ráðhús New York borgar á Manhattan þegar Vísir náði af henni tali.

Útgöngubanni hefur verið komið á í borginni og verður því engum heimilt að vera á faraldsfæti eftir klukkan 20 í kvöld. Mótmæli dagsins í dag séu því skipulögð fyrr en ella. Kolbrún segir mótmælin í New York að mestu hafa farið friðsamlega fram.

„Það er alltaf eitthvað öfgafólk. Það eru að koma inn anarkistar, anti-fasistasamtök og hvítir þjóðernissinnar sem eru að koma til að eyðileggja málstaðinn. Svo er auðvitað fullt af reiðu svörtu fólki sem er búið að fá nóg af mörg hundruð árum af kynþáttahatri. Maður skilur og styður þau. Það er svo skiljanlegt að fólk sé brjálað og vilji fá byltingu og breytingar,“ segir Kolbrún.

Margir þekkja til lögreglunnar í New York (NYPD) og er slagorð stofnunarinnar „New York‘s finest“ þekkt og hefur víða verið fjallað um málefni deildarinnar í sjónvarpi og kvikmyndum. Kolbrún segir að virðing hafi verið borin fyrir lögreglunni en viðhorfið hafi verið að breytast.

„Maður er alltaf að heyra Fuck the Police, How do you spell racists, N-Y-P-D og how do you spell murder N-Y-P-D en fólk er líka að mótmæla þessu útgöngubanni,“ segir Kolbrún.

Eins og áður segir hefur verið komið á útgöngubanni í mörgum borgum landsins og er New York þar á meðal, Kolbrún segir að henni líði ekki eins og hún sé örugg þegar hún má ekki ganga um götur bæjarins. „Mér finnst ég ekki vera örugg í landinu ef ég heyri bara í sírenum og þyrlum eftir klukkan 20 og ef forsetinn hótar að senda herinn á sitt eigið fólk“ segir Kolbrún.

Viðbrögð Donald Trump, Bandaríkjaforseta við mótmælaöldunni hafa verið gagnrýnd harðlega og hafa tíst hans um málið til að mynda verið fjarlægð fyrir að hafa hvatt til ofbeldis. Þá hefur Trump einnig hótað að bandarískir hermenn verði sendir út á götur borga til þess að kveða niður mótmælaölduna.

Ríkisstjóri New York, Andrew Cuomo hefur þó hafnað tilboði Trump og segist Kolbrún þakklát fyrir það. Forsetinn er þó ekki jafnsáttur með Cuomo og gagnrýndi hann harðlega í röð tísta í dag, sagði hann þar að mótmælendur hefðu tætt New York borg í sig.

Kolbrún, sem á bandarískan föður segist styðja mótmælin 100% og segir hálfbróður sinn, sem er svartur, hafa verið klökkan undanfarna daga yfir stuðningnum og viðurkenningu sársaukans sem svart fólk í Bandaríkjunum hafa þurft að þola. „Þetta er háalvarlegt vandamál og er svo djúpstætt í þessu landi segir Kolbrún og minnir á að mótmælin snúist ekki gegn einhverjum einum lögreglumanni heldur lögreglunni sem stofnun.

„Lögreglan á ekki að vera í þessu hlutverki að standa á móti fólki,“ segir Kolbrún og bætir við að í mótmælum sem hún hefur tekið þátt í hafi borið á því að lögreglumenn hafi viljað sýna mótmælendum stuðning en ekki geta brotið gegn skipunum yfirboðara sinna.

Kolbrún segir þá ekki sjá fyrir endann á mótmælaöldunni fyrr en að lögreglumaðurinn Derek Chauvin hefur verið dæmdur fyrir morðið á George Floyd. „Ef hann verður svo dæmdur saklaus, þá fyrst hef ég áhyggjur af Bandaríkjunum, þá mun allt verða brjálað hérna.“

New York er sú borg heimsins sem hefur farið hvað verst út úr faraldri kórónuveirunnar en Kolbrún segir að þrátt fyrir faraldurinn sé ekki annað hægt en að leggja sitt á vogarskálarnar í baráttunni fyrir mannréttindum.

„Þetta er náttúrulega sögulegt augnablik að vera að upplifa þetta á meðan við erum enn þá að berjast við Covid,“ segir Kolbrún og minnist á að hún hafi haldið sig heima og nánast ekki hitt neinn síðustu mánuði vegna faraldursins. Nú sé málstaðurinn það mikilvægur að ekki sé hægt að halda sig heima fyrir.“

„Ef ég fæ Covid og dey, þá dey ég allavega fyrir einhvern málstað sem er liggur við mikilvægari. Mótmælin eru svo ótrúlega mikilvæg og tímabær,“ segir Kolbrún og hvetur Íslendinga til að fjölmenna á samstöðu mótmæli á Austurvelli næsta miðvikudag.