Helmingslíkur á því að nýja flugfélagið verði að veruleika

Hreiðar Hermannsson, hótelstjóri Stracta hotels, segir að framtíð nýs flugfélags, sem hann vonast til að koma á laggirnar, skýrist á næstu dögum – jafnvel á morgun. Hann segir um helmingslíkur á því að áætlun sín gangi eftir.

Greint var frá því í síðustu viku að stofnun nýja flugfélagsins, sem á að fylla í skarðið sem WOW air skildi eftir sig, væri töluvert langt á veg komin. Leiðaráætlun hafði þegar verið teiknuð upp og þá voru bundnar vonir við að flugrekstrarleyfi fengist fyrir félagið innan nokkurra vikna.

Sjá einnig: Segir erlent flugfélag hafa áhuga á helmingi hlutafjár nýja flugfélagsins



Hreiðar er aðalsprauta verkefnisins en með honum í liði eru nokkrir fyrrverandi starfsmenn WOW. Hreiðar segir í samtali við Vísi í dag að enn þurfi þó að huga að ýmsu áður en félagið geti farið í hlutafjársöfnun.

„Til þess að það sé hægt að kynna málin þá þarf það að vera samkeppnishæft við þá aðila sem eru að fljúga inn í landið hér í dag og þá miðum við náttúrulega fyrst við alveg „basic“ lággjaldafélög.“

Málaferli Isavia og ALC ljón í veginum

Ertu bjartsýnn á að þetta gangi eftir?

„Í dag er það bara 50/50,“ segir Hreiðar. Verkefnið sé fjölþætt og einn liður geti sett allt á hliðina. Í því samhengi nefnir Hreiðar ýmis óhagstæð ytri skilyrði sem spili þar inn í, til að mynda óstöðuga krónu og málaferli Isavia og ALC, bandaríska flugvélaleigufyrirtækisins sem á hina kyrrsettu WOW-flugvél á Keflavíkurflugvelli.

„Þetta er allt sett undir sama hatt í þessu litla landi og það er náttúrulega ekki jákvæð umræða um að leigja íslensku félagi flugvélar.“

Á þetta benda einnig aðstandendur verkefnisins Fly Icelandic í grein sem Ástþór Magnússon, forsvarsmaður verkefnisins, og Nordine Ouabdesselam, fyrrverandi aðstoðarforstjóri fjármálasviðs Airbus, eru skrifaðir fyrir og send var til fjölmiðla í dag.

Í grein sinni segja þeir m.a. að hætta sé á því að Ísland lendi í „ruslflokki“ þegar kemur að leigu og sölu flugvéla til Íslands, falli málið í vil Isavia. Þá skora þeir á stjórnvöld að „stöðva óeðlilega viðskiptahætti á Keflavíkurflugvelli“.

Ekki að leggja árar í bát

Hreiðar segir að framtíð flugfélagsins skýrist væntanlega næstu daga, jafnvel seinni partinn á morgun. Honum hafi til dæmis þegar borist atvinnuumsóknir frá reyndum aðilum úr fluggeiranum og niðurstaðan verði vonandi jákvæð.

Væntingum sé þó stillt í hóf en ekki hefur verið samið um leigu á flugvélum og engar frekari hreyfingar hafa orðið á flugrekstrarleyfi fyrir félagið.

„Ég er ekki að leggja árar í bát og ef það gengur ekki eftir þessu módeli, eins og stundum er þegar eitthvað er strembið, þá finnur maður einhverja aðra leið til þess að leysa það. En samkvæmt þessu plani þá er það svona 50/50 og það skýrist kannski á morgun.“