Te & Kaffi geti betur einbeitt sér að kaffigerð með nýjum samningi

Þjónusta við kaffi- og vélbúnað Te & Kaffi á fyrirtækja- og veitingamarkaði verður framvegis í höndum Innness, en fyrirtækin hafa undirritað samstarfssamning þess efnis. Hið sama mun gilda um meirihluta smásölumarkaðarins. Innnes verður dreifingaraðili á kaffivörum Te & Kaffi og jafnframt sjá um uppsetningu, þjónustu og viðhald á kaffivélum fyrirtækisins.

Guðmundur Halldórsson, framkvæmdastjóri Te & Kaffi, segir í samskiptum við Vísi að samstarfið muni gera fyrirtækinu kleift að einbeita sér betur að kjarnastarfsemi sinni, þ.e. framleiðslu og vöruþróun á kaffi, sem og rekstri kaffihúsa.

Hann bætir við að breytingarnar muni ekki hafa teljandi áhrif á starfsmannafjölda Te & Kaffis. Fjórir tæknimenn hafa starfað á þjónustuverkstæði fyrirtækisins, sem sinnt hefur verkefnunum sem nú færast til Innnes.

„Einn þeirra mun halda áfram hjá okkur í hlutverki þjónustustjóra vegna kaffihúsanna, einn lætur af störfum í sumar sökum aldurs og tveir eru nú þegar komnir í vinnu hjá Innnes að sinna þeim viðskiptavinum sem Innnes tók yfir frá Te & Kaffi við gerð þessa samkomulags,“ segir Guðmundur.

„Te & Kaffi rekur 14 kaffihús víðsvegar um höfuðborgarsvæðið og eitt á Akureyri ásamt því að sjá um sölu og dreifingu á okkar framleiðslu í allar helstu matvöruverslanir landsins. Kaffihúsin og matvörumarkaðurinn eru mjög stór hluti heildarveltunnar. Þessum viðskiptum erum við að sinna sjálf alla daga hér hjá þessu 35 ára gamla fjölskyldufyrirtæki,“ segir framkvæmdastjórinn ennfremur.