Magic er kominn heim

Körfuboltagoðsögnin Magic Johnson er kominn aftur til síns félags, LA Lakers.

Hann mun vera sérstakur ráðgjafi fyrir eiganda félagsins, Jeanie Buss. Ekki veitir af þar sem það ætlar að reynast mjög erfitt verk að gera Lakers aftur að sigursælu liði.

„Ég ræð mér ekki fyrir kæti að vera kominn aftur,“ sagði Magic en hann spilaði með Lakers allan sinn 13 ára feril í NBA-deildinni og vann á þeim tíma fimm meistaratitla.

„Ég mun gera allt sem ég get til þess að koma Lakers aftur á sinn rétta stall með bestu liðum deildarinnar.“

Magic hefur verið með puttana mikið í Lakers síðan hann hætti. Hann átti hlut í félaginu til ársins 2010 og var heiðursforseti hjá félaginu þar til í fyrra.