Tekst LeBron og félögum að stöðva Golden State á heimavelli?

LeBron James og félagar í Cleveland Cavaliers mæta Golden State Warriors í stórleik dagsins í NBA-deildinni í kvöld en þetta verður í fyrsta sinn sem liðin mætast síðan í úrslitunum í vor.

Aðeins sex mánuðir eru síðan leikmenn Golden State voru krýndir NBA-meistarar eftir að hafa sigrað einvígið gegn löskuðu liði Cleveland Cavaliers 4-2.

Gengi Golden State í upphafi tímabilsins hefur einfaldlega verið ótrúlegt þrátt fyrir að þjálfari liðsins, Steve Kerr, sé ekki með liðinu en hann er að ná sér eftir að hafa gengist undir aðgerð í sumar vegna bakmeiðsla.

Hefur Golden State unnið alla 13 heimaleiki sína á tímabilinu og aðeins tapað einum leik af fyrstu 27 leikjum tímabilsins. Hóf liðið tímabilið á því að vinna fyrstu 24 leikina.

Það er ljóst að verkefnið verður erfitt fyrir leikmenn Cleveland Cavaliers en Golden State hefur unnið 31 leiki í röð á heimavelli í deildarkeppninni.

Það skyldi hinsvegar enginn útiloka Cleveland Cavaliers sem endurheimti á dögunum leikstjórnandann Kyrie Irving úr meiðslum.

Cleveland hefur byrjað tímabilið af krafti og unnið 19 af fyrstu 26 leikjum tímabilsins og situr í efsta sæti Austurdeildarinnar.

Leikurinn hefst klukkan 22:00 og verður í beinni útsendingu á Stöð 2 Sport og Stöð 2 Sport HD.

Alls fara fimm leikir fram í NBA-deildinni í dag en klukkan 19:30 tekur Oklahoma City Thunder á móti Chicago Bulls í Chesapeake Energy Arena og verður leikurinn í beinni útsendingu á Stöð 2 Sport.

Oklahoma hefur unnið fjóra leiki í röð og alls unnið 20 leiki af 29 en Kevin Durant hefur leikið mjög vel með liðinu eftir að hafa náð sér af meiðslum í sumar.

Leikmenn Chicago Bulls mega hinsvegar ekki við fleiri tapleikjum í baráttunni í Austurdeildinni en Chicago hefur tapað þremur leikjum í röð fyrir leik kvöldsins.

Leikir kvöldsins:

17:00 New Orleans Pelicans - Miami Heat

19:30 Oklahoma City Thunder - Chicago Bulls, í beinni á Stöð 2 Sport.

22:00 Golden State Warriors - Cleveland Cavaliers, í beinni á Stöð 2 Sport.

01:00 San Antonio Spurs - Houston Rockets

03:30 Los Angeles Clippers - Los Angeles Lakers