Tveggja leikja bann vegna slagsmála um konu

NBA-deildin hefur dæmt Matt Barnes, leikmann Memphis, í tveggja leikja bann fyrir að hafa ráðist á þjálfara NY Knicks, Derek Fisher.

Atvikið átti sér stað í byrjun október. Fisher var þá að slá sér upp með fyrrum eiginkonu Barnes. Leikmaðurinn mætti heim til hennar og réðst á Fisher enda ekki ánægður með ráðahaginn.

Sjá einnig: Fisher klagaði í lögguna og NBA-deildina

Þeir þekkjast vel frá því þeir léku saman með LA Lakers á sínum tíma.

Barnes var hundfúll að Fisher skildi gera mikið mál úr þessum átökum og fara með málið fyrir deildina.

Hann er væntanlega ekkert kátari í dag með bannið en hann verður einnig án launa meðan hann er í leikbanninu.