Hólmbert Aron Friðjónsson hefur gengið frá tveggja og hálfs árs samning við KR og verður löglegur með Vesturbæjarliðinu í Pepsi-deildinni þegar glugginn opnar 15. júlí næstkomandi.
Hólmbert Aron var í viðræðum við bæði Val og Breiðablik en ákvað að semja við KR.
KR-liðið hefur verið í vandræðum með að skora mörk upp á síðkastið og liðið var sem dæmi með undir mark að meðaltali í deildarleikjum sínum í júnímánuði.
Hólmbert Aron ætti að geta bætt úr því vandmáli en fyrsti leikur hans verður mögulega á móti FH á Kaplakrikavelli 19. júlí næstkomandi.
Hólmbert Aron er 22 ára framherji sem er uppalinn hjá HK en spilaði með Fram áður en hann fór út í atvinnumennsku eftir 2013 tímabilið.
Hólmbert Aron fann sig ekki hjá Celtic eða danska liðinu Bröndby þar sem hann var á láni og snýr nú aftur heim í Pepsi-deildina þar sem hann skoraði 10 mörk í 21 leik sumarið 2013.
Stjarnan
Valur
