Treyja Rose vinsælust í NBA-deildinni

Kobe Bryant og LeBron James eru ekki lengur vinsælustu leikmenn NBA-deildarinnar. Í það minnsta ekki ef mið er tekið af treyjusölu í NBA-deildinni.

Það er Derrick Rose, verðmætasti leikmaður NBA-deildarinnar á síðustu leiktið, sem er búinn að selja flestar treyjur frá því í apríl í fyrra. Bulls-treyjan með nafninu hans á bakinu hefur rokið út.

Jeremy Lin hjá NY Knicks er í öðru sæti í treyjusölunni þó svo hans treyja hafi ekki verið í sölu fyrr en í febrúar á þessu ári. Ótrúleg sala á Lin-treyjum.

Bryant á þriðju vinsælustu treyjuna en James varð að sætta sig við fjórða sætið að þessu sinni.

Carmelo Anthony, leikmaður NY Knicks, varð svo í fimmta sæti.