San Antonio Spurs gefur ekkert eftir á toppi Vesturdeildarinnar í NBA-deildinni í körfubolta en liðið vann sinn ellefta leik í röð í nótt. Boston Celtics og Miami Heat unnu bæði sína leiki og Oklahoma City Thunder tókst að enda þriggja taphrinu sína en hún hafði kostað liðið efsta sætið í Vestrinu.
Tony Parker skoraði 28 stig í 114-104 sigri San Antonio Spurs á Utah Jazz en Spurs hefur þar með unnið 11 leiki í röð í annað skiptið á tímabilinu. Manu Ginobili skoraði 23 stig fyrir Spurs en hjá Utah var Al Jefferson með 19 stig og 10 fráköst. Utah er í 9. sæti og því utan úrslitakeppninnar eins og er.
LeBron James var með 26 stig og Chris Bosh skoraði 22 stig þegar Miami Heat vann Detroit Pistons 98-75. Miami lék án Dwyane Wade í ellefta skiptið á tímabilinu en liðið hefur unnið tíu af þeim leikjum. Brandon Knight var stigahæstur hjá Detroit með 16 stig. Miami er tveimur sigurleikjum á eftir Chicago Bulls sem er efst í Austurdeildinni.
Kevin Durant var með 23 stig þegar Oklahoma City Thunder vann Toronto Raptors 91-75 en Thunder-liðið var búið að tapa þremur leikjum í röð fyrir leikinn. Oklahoma City lagði grunninn að sigrinum með því að skora 24 stig í röð í þriðja og fjórða leikhluta. Jose Calderon skoraði mest fyrir Toronto eða 19 stig.
Kevin Garnett skoraði 20 stig og Rajon Rondo gaf tíu stoðsendingar eða meira í 17. leiknum í röð þegar Boston Celtics vann Philadelphia 76ers 103-79. Rondo endaði með 15 stoðsendingar en þeir Brandon Bass og Avery Bradley voru báðir með 18 stig og Paul Pierce skoraði 17 stig. Þetta var sjöundi sigur Boston í síðustu níu leikjum. Nikola Vucevic skoraði 14 stig fyrir Sixers og Andre Iguodala var með 13 stig en Philadelphia-liðið hefur tapað 10 af síðustu 14 leikjum sínum.
Úrslit allra leikja í NBA-deildinni í nótt:
Boston Celtics - Philadelphia 76Ers 103-79
New Jersey Nets - Cleveland Cavaliers 122-117 (framlenging)
Miami Heat - Detroit Pistons 98-75
San Antonio Spurs - Utah Jazz 114-104
Oklahoma City Thunder - Toronto Raptors 91-75
Sacramento Kings - Houston Rockets 87-104
Staðan í NBA-deildinni:Á nba.com eða yahoo.com
NBA: Ellefti sigur San Antonio í röð | Miami vinnur áfram án Wade
