Kobe Bryant aftur í bann?

Svo gæti farið að Kobe Bryant hjá LA Lakers yrði í leikbanni í kvöld þegar liðið mætir Milwaukee Bucks á útivelli. Bryant fékk dæmda á sig sóknarvillu í leiknum sem var mjög lík þeirri sem hann fékk í leik gegn San Antonio í janúar og kostaði hann leikbann.

Marko Jaric hjá Minnesota varði skot Bryant þegar skammt var til leiksloka í nótt og baðaði Bryant út höndunum og sló Jaric í andlitið. Bryant fékk dæmda á sig villu í kjölfarið og þykir þetta sláandi líkt atvikinu frá því í janúar þar sem hann sló til Manu Ginobili hjá San Antonio. Bryant fékk reyndar ekki dæmda á sig villu í það skiptið, en eftir að aganefnd skoðaði myndbandið af atvikinu, var ákveðið að setja Bryant í eins leiks bann.

Þótti þetta mjög umdeildur dómur á sínum tíma, en þegar það atvik er skoðað, er auðvelt að skilja rökstuðning beggja aðila. Smelltu hér til að sjá myndband af atvikinu frá í janúar.