Fékk rautt eftir 30 sekúndur

Argentínumenn þurftu ekki að sýna á sér sparihliðarnar þegar þeir sóttu Ungverja heim í æfingaleik í gær og höfðu sigur 2-1, þrátt fyrir að leika manni færri síðustu 25 mínútur leiksins. Það var Maxi Rodriguez sem kom Argentínumönnum yfir eftir 17 mínútna leik, en lærisveinar Lothar Matthaus náðu að jafna metin rétt fyrir lok fyrri hálfleiksins. Það var loks varnarmaðurinn Gabriel Heinze hjá Manchester United sem tryggði Argentínumönnum sigurinn í leiknum með glæsilegu skallamarki á 65. mínútu, en skömmu síðar var hinum unga og efnilega Lionel Messi hjá Argentínu vikið af leikvelli á óréttmætan hátt eftir að hafa verið inni á vellinum í um hálfa mínútu í sínum fyrsta landsleik. Sannarlega grátbroslegt fyrir hinn unga leikmann Barcelona og ljóst að hann á ekki eftir að gleyma fyrsta landsleiknum sínum í bráð.