Lög­reglan biðlar til fólks að flýta ferðum eða bíða

Hrafn Guðmundsson veðurfræðingur á Veðurstofunni segir veðurspána fyrir morgundaginn ekki hafa breyst mikið og því líklega halda.  Gular og appelsínugular veðurviðvaranir hafa verið gefnar út fyrir morgundaginn, en gert er ráð fyrir komu mjög djúprar lægðar sem á að ganga yfir landið, fyrst á suður- og Suðausturlandi þar sem gular viðvaranir taka gildi klukkan sex í morgunsárið, ef spár ganga eftir.

Lægðin færir sig síðan til vesturs og gert ráð fyrir 15-25 metrum á sekúndu og snörpum vindhviðum við Faxaflóann og Breiðafjörðinn þegar líður á morguninn og talsverðri úrkomu. Ferðaveður verður varasamt og lausamunir geta fokið.

Versta spáin er fyrir norðanverða Vestfirði, Strandir og Norðurland vestra þar sem gera á norðan stórhríð, með hvassviðri, lélegu skyggni og snjó á vegum, sem sagt engu ferðaveðri. Þar taka appelsínugular viðvaranir gildi síðdegis á morgun og gilda inn í nóttina.

Óvenju djúp lægð

„Það verður óvenju djúp lægð sem kemur að landi núna og verður kominn stormur í fyrramálið víða á landinu, austanstormur. Það fylgir þessu mikil úrkoma, það verður mikið vatnsveður,“ segir Hrafn.

Til fjalla og á Norðurlandi gæti fylgt líka slydda og snjókoma.

Hann segir lægðina fara tiltölulega hratt yfir landið og það verði ör breyting á veðri. Seinnipartinn verði vindur norðlægari vestantil á landinu og þá komi kaldara loft með og þá verði norðanhríð, sérstaklega á Norðvesturlandi.

„Þessi hríð byrjar á Vestfjörðum en dregst svo yfir inn á land meira og kemur inn á Norðvesturlandið með slyddu og snjókomu.“

Hrafn segir viðbúið að það verði ekkert ferðaveður, mjög slæmt veður, á Vestfjörðum og Norðvesturlandi seinni partinn og annað kvöld þegar það gangi í þessa norðanhríð en veðrið verði skaplegra sunnan og vestan til á landinu seinni partinn á morgun.

„Þetta verður verst á norðvesturhluta landsins,“ segir hann og að með þessu kólni og það megi búast við versnandi færð.

Byrjar að hvessa í fyrramálið

Hann segir að það byrji að hvessa í nótt og í fyrramálið verði kominn stormur sunnantil sem færi svo norðantil og þá verði meiri snjókoma.

„Það verður komið vonskuveður í fyrramálið.“

Hann segir mikilvægt að fylgjast vel með veðurspá og færð ef það þarf að vera á ferðinni, sérstaklega á Norðvesturlandi. Hægt er að fylgjast með veðri á vef Veðurstofu og færð á vef Vegagerðarinnar.

Fréttin hefur verið uppfærð klukkan 07:23 með viðtali við veðurfræðing.