Samninga­nefnd Reykja­víkur­borgar leyst undan störfum

Á fundi borgarráðs á fimmtudag lagði Hildur til að SÍS fengi umboð til kjarasamningsgerðar fyrir hönd borgarinnar við stéttarfélög. Síðan 1989 hefur sérstök samninganefnd verið með umboðið en borgarstjóri skipar í hana. SÍS hefur þó sinnt ýmsum viðræðum fyrir hönd borgarinnar, þar á meðal við kennara og Félag íslenskra hljómlistarmanna. 

„Hagsmunir Reykjavíkurborgar liggja í þéttu og öflugu samstarfi á vettvangi kjaramála hins opinbera og með hliðsjón af þróun mála á opinberum vinnumarkaði, sér í lagi með þeirri þróun sem hefur orðið á umræðu og umgjörð á virðismati starfa hins opinbera, er fullt tilefni til þess að endurskoða sérkjarasamningsstefnu Reykjavíkurborgar,“ segir í minnisblaði Lóu Birnu Birgisdóttur, sviðsstjóra mannauðs- og starfsumhverfissviðs, sem fylgdi tillögu Hildar. Með sameiginlegri kjarasamningsgerð megi styrkja samningsstöðu sveitarfélaganna.

Vilja ekki eiga Jafnlaunastofu

Hildur leggur einnig til að sameiginlegt eignarhald og ábyrgð á Jafnlaunastofu verði endurskoðað. Félagið hefur fengið jöfn framlög frá Reykjavíkurborg og SÍS og er hlutverk félagsins meðal annars að hafa umsjón með rekstri verkefnastofu starfsmats. Sé SÍS með umboð til kjarasamningsgerðar fyrir hönd borgarinnar sé það úrelt fyrirkomulag að borgin sé eigandi félagsins. 

Greiðslur til fulltrúa í samningsnefnd og vegna starfa formanns og varaformanns á skrifstofu kjaramála nema 58,8 milljónum á ári og rekstur Jafnlaunastofu kostar borgina 55,5 milljónir. Áætlað samningsgjald sé 48,4 milljónir og þannig sparist tæpar 66 milljónir á ári

Lýðræðishalli og stefnuleysi

Tillagan var samþykkt með fimm atkvæðum Sjálfstæðisflokks, Viðreisnar, Framsóknar og Miðflokks. Pétur Marteinsson og Skúli Helgason, fulltrúar Samfylkingar, greiddu hins vegar atkvæði gegn tillögunni og sögðu meirihlutann reyna að fría sig pólitískri ábyrgð á kjarasamningum eigin starfsfólks. 

„Að stærsti atvinnurekandinn á sveitarstjórnarstiginu ætli að afhenda kjarasamningsumboð sitt í heild sinni til hagsmunasamtaka úti í bæ, í stað þess að leiða slíkar viðræður og bera ábyrgð gagnvart vinnandi fólki í borginni, lýsir ákveðnum lýðræðishalla og stefnuleysi. Það er sjálfsögð viðleitni að leita leiða til að hagræða og spara í útgjöldum borgarinnar og hér er boðuð hagræðing upp á 65 m.kr. Það er vel en sá sparnaður yrði skammgóður vermir ef hann leiðir til þess að borgin fórni meiri hagsmunum við kjarasamningsborð í framtíðinni,“ segir í bókun þeirra. 

Firri sig ábyrgð

Sanna Magdalena Mörtudóttir, borgarfulltrúi Vinstrisins, er áheyrnarfulltrúi í ráðinu og bókaði einnig gegn tillögunni. 

„Fulltrúi Vinstrisins mótmælir þessari tillögu og telur að Reykjavíkurborg eigi sjálf að sinna kjarasamningsgerð og bera ábyrgð gagnvart fólkinu sem vinnur fyrir hana í stað þess að færa ákvarðanatöku frá borginni og firra sig þannig pólitískri ábyrgð,“ segir í bókun hennar. 

Málið fer nú til endanlegrar afgreiðslu borgarstjórnar. Í fyrrnefndu minnisblaði sviðsstjóra mannauðs- og starfsumhverfissviðs er gert ráð fyrir að SÍS fái umboð 1. október næstkomandi og því eru allar líkur á að málið verði lagt fyrir borgarstjórn á næsta fundi hennar.