Báðir að­stoðar­mennirnir horfnir á stuttum tíma

„Þetta var mín ákvörðun og gert í samráði og sátt við ráðherrann. Ég er mjög ánægður með minn tíma og við fengum mörg góð mál í gegn, sérstaklega á vorþingi. Mér fannst þetta vera fínn tímapunktur til að staldra við, skipta um starfsvettvang og er að leita mér að næsta starfstækifæri,“ segir Þórólfur við Vísi.

Hann og Jakob urðu aðstoðarmenn dómsmálaráðherra fljótlega eftir að hún tók við embættinu í lok ársins 2024. 

Jakob gekkst við kynferðislegri áreitni

Þórdís Valsdóttir tók við af Jakobi fyrr á þessu ári en hún starfaði áður sem upplýsingafulltrúi dómsmálaráðuneytisins. Ekki er búið að ráða í staðinn fyrir Þórólf en ráðherrar ríkisstjórnarinnar eru alla jafna með tvo aðstoðarmenn hver.

Þegar greint var frá því í mars að Jakob væri að yfirgefa ráðuneytið eftir rúmt ár í starfi sagðist hann vilja einbeita sér meira að uppistandi og öðrum hliðargreinum sem hafi togað í hann. 

Í ágúst gekkst hann svo við því að hafa snert samstarfskonu sína í dómsmálaráðuneytinu á ósæmilegan hátt þegar hann starfaði enn sem aðstoðarmaður ráðherra. Hann hafi látið af störfum hjá ráðuneytinu í kjölfarið og hætt allri áfengisneyslu.

Atvikið hafi átt sér stað á skemmtun á vegum ráðuneytisins síðasta vetur. „Þar átti ég í samskiptum við samstarfskonu mína og snerti hana á ósæmilegan hátt. Ég bað hana innilega afsökunar á þessu atviki og taldi málinu lokið,“ sagði Jakob í yfirlýsingu í ágúst.

Fréttin hefur verið uppfærð.