Gengið aldrei verið lægra

Virði Icelandair hefur verið síbreytilegt síðustu ár. Við lokun markaða 2. janúar var virðið 0,90 krónur á hlut. Það hefur því fallið um tæp 29 prósent á árinu. Viðskipti dagsins voru 103 talsins fyrir tæpar 83 milljónir króna. Virðið var lægst 0,59 skömmu fyrir lokun markaða. 

Ótímabundið verkfall

Í hádeginu lauk atkvæðagreiðslu flugvirkja um verkfallsaðgerðir. Þar samþykktu rúm 88 prósent þeirra sem greiddu atkvæði að hefja aðgerðir klukkan 0:01 aðfaranótt miðvikudagsins 23. september. Aðgerðirnar munu hafa gríðarleg áhrif á starfsemi flugfélagsins og ljóst að fjöldi farþega mun finna fyrir raski á flugáætlun félagsins. 

Icelandair hefur staðið í ströngu síðustu misseri. Eldsneytisverð hefur hækkað gríðarlega vegna átaka í Miðausturlöndum og flugmenn Icelandair eru enn í ströngum kjaraviðræðum. Samningar þeirra hafa verið lausir síðan í október á síðasta ári. 

Flugmenn ósáttir með kaupin

Félagið keypti nýlega 49 prósenta hlut í Fly Play Europe Holdco ehf. sem flugmenn voru ekki ánægðir með. Félag íslenskra atvinnuflugmanna gaf út yfirlýsingu í kjölfarið þar sem sagt var að tilvonandi rekstrarform Icelandair byggði á félagslegu undirboði, sniðgöngu kjarasamninga og flutningi starfa úr landi. 

Á síðasta ársfjórðungi tapaði félagið fjórum milljörðum króna þrátt fyrir mettekjur. Í ársfjórðungsuppgjöri sem birt var í júlí segir að búist sé við rekstrarbata og meteiningartekjum á þriðja ársfjórðungi sem lýkur um mánaðamótin næstu.