Flug­virkjar fara í verk­fall

Þetta kemur fram í tilkynningu Icelandair til Kauphallar.

Atkvæðagreiðsla félagsmanna hófst á föstudag og lauk á hádegi í dag. Skömmu eftir að tilkynning Icelandair barst til Kauphallar birti FVFÍ stutta færslu um atkvæðagreiðsluna á vef sínum. Þar segir að kjörsókn hafi verið 92 prósent og að 88,3 prósent þeirra sem greiddu atkvæði hafi samþykkt vinnustöðvunina. 

„Flugvirkjar starfandi hjá Icelandair hafa staðið í kjaradeilu við fyrirtækið undanfarna mánuði. Kjarasamningar urðu lausir um síðustu áramót en viðræður aðila hófust í nóvember 2025. Þann 13. febrúar vísaðu Samtök atvinnulífsins, sem fara með samningsumboð fyrir hönd Icelandair, deilunni til ríkissáttasemjara. Þrátt fyrir milligöngu ríkissáttasemjara hefur lítið miðað í deilunni. Eftir fund hjá ríkissáttasemjara þann 22. júní slitnaði upp úr viðræðum milli aðila,“ segir í tilkynningunni frá FVFÍ.

Í september eru áætlunarflug Icelandair um 110 talsins á dag og fjöldi farþega um fimmtán þúsund. Ljóst er að verkfallið hefur áhrif á fjölda fólks.

Í tilkynningu Icelandair segir að náist ekki að semja við flugvirkjana áður en verkfallsaðgerðir hefjast muni flugáætlun þeirra verða fyrir miklum áhrifum. Á þessu stigi sé ekki hægt að segja til um hve mikil áhrif boðað verkfall muni hafa á fjárhag félagsins. 

Bogi Nils Bogason, forstjóri Icelandair, sagði fyrir helgi að afleiðingar verkfallsins yrðu afar slæmar. Hann varaði við því að áhrif verkfallsins myndu ná langt út fyrir starfsemi félagsins, hafa áhrif á þúsundir farþega og íslenska ferðaþjónustu og hagkerfið í heild.

Flugvirkjar hafi þegar fengið launahækkanir og að vinnumarkaðsmódelið hér á landi gangi ekki til lengdar. 

Flugvirkjar svöruðu með því að lýsa vonbrigðum með framgöngu og yfirlýsingar Boga. Flugvirkjar yrðu að fá að greiða atkvæði í friði. 

„Flugvirkjar eru ekki að kjósa um það hvort Ísland verði opið eða lokað. Flugvirkjar loka ekki landinu. Verkfall myndi hafa veruleg áhrif á starfsemi Icelandair, en Icelandair er ekki eina flugfélagið sem flýgur til og frá Íslandi. Áhrifin geta verið mikil án þess að ein starfsstétt hafi þar með í höndum sér að „loka landinu“,“ segir í yfirlýsingu Óskars Einarssonar, formanns FVFÍ, á vefsíðu félagsins í dag.

Fréttin var uppfærð kl. 14:44 með tilkynningu FVFÍ.