Eggert skipaður forstjóri Hafrannsóknastofnunar

Í tilkynningu frá atvinnuvegaráðuneytinu kemur fram að embættið hafi verið auglýst laust til umsóknar þann 5. maí síðastliðinn og bárust alls átta umsóknir. Hanna Katrín Friðriksson atvinnuvegaráðherra skipaði þriggja manna ráðgefandi hæfnisnefnd til að leggja mat á hæfni umsækjenda.

Þar kemur fram um Eggert að hann hafi lokið meistaranámi í rafmagnsverkfræði frá Háskólanum í Karlsruhe árið 1990, MBA prófi árið 1997 frá IESE viðskiptaháskólanum í Barcelona og stjórnunarnámi (AMP) árið 2012 frá sama skóla.

Þá segir að hann hafi fjölbreytta reynslu úr atvinnulífinu, einkum af æðstu stjórnunar- og leiðtogastörfum. Frá október 2025 hafi Eggert verið starfandi forstjóri Hafrannsóknarstofnunar þegar hann var settur tímabundið í embættið. Á árunum 2022 til 2025 hafi hann starfað sem leiðtogi á sviði sjálfbærrar þróunar í forsætisráðuneytinu og var forstöðumaður Grænvangs, samstarfsvettvangs stjórnvalda og atvinnulífs um loftslagsmál og grænar lausnir á árunum 2019 til 2021.

Eggert gegndi starfi forstjóra HB Granda hf. á árunum 2005 til 2012, en áður var hann markaðsstjóri sama fyrirtækis frá árinu 2004. Frá árinu 2012 til 2015 var Eggert forstjóri N1 hf. Þá var hann forstjóri eTactica ehf., nýsköpunarfyrirtækis á sviði raforkueftirlitskerfa, á árunum 2016 til 2018 og ráðgjafi hjá IceCure ehf. á árunum 2015 til 2024. Eggert starfaði hjá Philips Electronics á árunum 1997 til 2004, meðal annars sem forstöðumaður viðskiptaþróunar í Bandaríkjunum.

Þá kemur einnig fram að hann hafi gegnt fjölmörgum stjórnar- og trúnaðarstörfum, m.a. sem formaður Leikfélags Reykjavíkur og stjórnarmaður hjá Landsneti hf., HB Granda hf. og Brimi hf., Viðskiptaráði Íslands, Íslandsstofu og Háskólanum í Reykjavík.