„Eigin­lega bara ó­for­skammað“

Þetta segir Kári Sigurðsson, formaður stéttarfélagsins Sameykis. Enn sé unnið að því að ná utan um umfang aðgerðanna og borgin hafi ekki svarað fyrirspurn stéttarfélagsins.

RÚV greindi fyrst frá. Kári fordæmir aðgerðirnar og segir þær í engu samræmi við yfirlýsingar borgarmeirihlutans um að grunnþjónustu verði hlíft í aðhaldsaðgerðum. 

Skólaliðar sinni ekki einungis þrifum og séu til staðar fyrir nemendur. Ljóst sé að starfsfólkið sem komi í staðinn verði ekki hluti af umhverfi barnanna með sama hætti.

„Þarna eru börn og ungmenni að missa mikilvæga aðila í skólunum frá sér.“

Hefur áhrif á nítján skóla

Í júlí samþykkti Innkaupa- og framkvæmdaráð Reykjavíkurborgar að taka tilboðum Daga og Sólar í þrif á fjölda skóla.

„Þetta eru nítján skólar í heildina sem er verið að útvista þrifunum í,“ segir Kári. Þeirra á meðal eru Grandaskóli, Hagaskóli, Melaskóli, Brúarskóli, Hvassaleitisskóli, Vesturbæjarskóli og Klettaskóli. Kári bendir á að vinna við útboðið hafi byrjað í tíð fyrri borgarstjórnar.

Hann bíður enn eftir því að fá staðfestar tölur um uppsagnir frá borginni og segir að fyrirspurn um aðhaldsaðgerðir hafi staðið ósvöruð frá því í byrjun júlí.

Sé ekki í samræmi við fullyrðingar meirihlutans

Kári segir þessar aðgerðir í engum takti við það sem fulltrúar meirihlutans hafi talað um.

„Þarna ertu ekkert að minnka einhverja yfirbyggingu. Þarna ertu bara að ráðast beint að grunnþjónustunni, þú ert að ráðast á garðinn þar sem hann er lægstur hjá borginni. Þú ert að ráðast á nærþjónustuna þar sem þú ert með fólk sem er að vinna störf sem eru mjög mikilvæg og eru svo miklu meira heldur en bara störf við þrif í skólunum.“

Kári setur spurningamerki við það hvort þessum aðgerðum fylgi mikill fjárhagslegur sparnaður fyrir borgina. Skólaliðar séu ekki hálaunafólk og nýsamþykktir samningar um þrif í umræddum skólum hljóði upp á um 176 milljónir króna á ári.

Fordæmir skort á svörum

„Við erum mjög áhyggjufull yfir því þegar verið er að útvista svona verkefnum,“ segir Kári um afstöðu Sameykis og annarra stéttarfélaga starfsfólks í opinberri þjónustu.

„Það er náttúrulega ekkert samráð og ég held að yfirsýnin sé afskaplega lítil einhvern veginn. Það er bara verið að pikka og plokka í eitthvað núna.“

Sameyki fari fram á að borgaryfirvöld rökstyðji þessa ákvörðun með greinagóðum hætti. Félagið hafi fyrst óskað eftir upplýsingum um fyrirhugaðar aðhaldsaðgerðir í byrjun júlí.

„Það er eiginlega bara óforskammað að vera ekki búið að svara þessu,“ segir Kári.

„Ef það á að segja að þetta sé sparnaður, þá verður að sýna fram á að þetta sé sparnaður og að þetta sé ekki skerðing á grunnþjónustu í leiðinni. Vegna þess að þau voru mjög skýr um það í aðdraganda kosninganna og þegar þau tóku við. Ég get séð hvorugt í þessari aðgerð.“

Fréttin hefur verið uppfærð.