Fimm hundruð milljóna króna við­hald á dag­skrá

Undanfarin ár hefur sóknarnefnd Akureyrarkirkju þurft að mæta ófyrirséðum útgjöldum þegar kemur að viðhaldi kirkjunnar.

„Fyrst var bolta sparkað í gegnum rúðuna í einn af strengdu gluggunum. Svo var kveikt í útidyrahurðinni og þriðja áfallið þegar kirkjan var spreyjuð að utan. Svo fór þakið að leka á safnaðarheimilinu þannig þetta hefur ekki verið neitt fyrirbyggjandi viðhald,“ sagði Hjörtur Narfason, formaður sóknarnefndar kirkjunnar.

Árið 2040 verða liðin hundrað ár frá því að kirkjan var vígð og er stefnt að því að þá verði kirkjan komin í gott stand þannig að hún geti staðið næstu hundrað árin.

„Til þess að það geti gerst þarf að skipta um gólfið í kirkjuskipinu, koma loftræstingu þangað inn, laga orgelið, setja nýtt eldhús í safnaðarheimilið og klára það að utan eftir vatnstjón þannig það er af nógu að taka.“

Vinir Akureyrarkirkju

Kostnaðaráætlun hefur verið sett fram og hljóðar upp á 500 milljónir. Unnið er að því að safna fjármagni fyrir framkvæmdunum og hefur styrktarfélagið Vinir Akureyrarkirkju verið stofnað.

„Svona styrktarfélag þar sem einstaklingar og fyrirtæki geta lagt kirkjunni lið, óbundið einhverju trúarstarfi. Þetta snýst eingöngu um viðhald á þessu vörumerki Akureyrar sem heitir Akureyrarkirkja.“

Allt fé fer eingöngu í framkvæmdir

Hjörtur hvetur einstaklinga og fyrirtæki til að leggja verkefninu lið.

Það er hægt að fara inn á síðuna eða á Faceook síðu vina Akureyrarkirkju. Þar eru leiðbeiningar, annað hvort að gerast árlegur vinur sem eru 10 þúsund á ári eða að leggja eitthvað styrktarfé inn á reikninginn hjá okkur til að styðja við bakið á framkvæmdum. Allt fé sem safnast þarna inn fer eingöngu bara í framkvæmdir við sjálfa bygginguna.“