Grunuðum þjófum vísað úr landi og meinuð endur­koma í 7 ár

Lögreglan á Norðurlandi vestra stöðvaði bifreið fólksins á suðurleið á fimmtudagskvöld vegna gruns um hraðakstur. Ökumaðurinn framvísaði ökuskírteini en ekki reyndist unnt að bera kennsl á hina tvo þar sem þeir kváðust ekki vera með skilríki.

Við nánari athugun kom í ljós að fólkið hafði meðal annars komið við sögu vegna dvalarleyfa og gruns um þjófnaði. Það var handtekið og bifreiðin færð á lögreglustöðina á Blönduósi.

Við leit í bifreiðinni fannst talsvert magn af ætluðu þýfi, þar á meðal peningar, skartgripir og ýmsir aðrir munir.

Fólkinu var í kjölfarið birt ákvörðun Útlendingastofnunar um brottvísun og sjö ára endurkomubann. Það verður í gæsluvarðhaldi þar til hægt verður að flytja það til heimalands síns.

Héraðsdómur Norðurlands vestra úrskurðaði fólkið upphaflega í allt að þriggja vikna gæslu. Landsréttur staðfesti úrskurðinn í dag en stytti gæsluvarðhaldið í tvær vikur.