Vann þriggja stiga skotkeppni WNBA og skoraði á Curry

Fudd, sem var valin fyrst í nýliðavalinu 2026, náði í 30 af 40 mögulegum stigum í lokaumferðinni og hafði þar betur gegn Bridget Carleton sem endaði með 19 stig.

„Ég var mjög stressuð en ég var líka spennt. Það er gaman að gera þetta því, og ég vil ekki hljóma montin, en þetta er auðvelt fyrir mig, bara stöðuskot. Ég þarf bara að taka boltann af grindinni og síðan er þetta í raun í vöðvaminninu. Þetta er það sem ég hef verið að gera síðan ég var ung,“ sagði Azzi Fudd.

Fudd er í tíunda sæti í deildinni með 2,2 þriggja stiga körfur að meðaltali í leik á þessu tímabili.

Hún þakkaði foreldrum sínum fyrir skottæknina, sérstaklega móður sinni, en skot hennar er að sögn Fudd alveg eins og hennar eigið. En Fudd sagði einnig að hæfileiki hennar til að hitta ítrekað úr skoti frá sama stað stafaði af endurhæfingu hennar vegna meiðsla.

Fudd notaði líka tækifærið til að skora á sjálfan Step Curry sem er góður vinur hennar og að flestum talinn vera besti skotmaður sögunnar.

„Steph, ef þú ert að hlusta. Ég er búin að vera að biðja um aðra þriggja stiga keppni við þig síðan ég var í gagnfræðaskóla. Kannski er þetta tækifærið til að fara að skipuleggja tíma og stað,“ sagði Azzi brosandi.