Segir Depp hafa sturlast úr af­brýðis­semi

Cara Delevingne var gestur í hlaðvarpi fjölmiðlamannsins Louis Theroux þar sem hann spurði út í samband hennar og Amber Heard, sem hafði aldrei verið staðfest og var um stund mikið á milli tannanna á fólki. 

Hjónaband Heard og Depps vakti athygli en þó engan veginn jafn mikla og skilnaður þeirra, sem varð meðal annars að heimildarmynd á streymisveitunni Netflix. Fyrrverandi hjónin ásökuðu bæði tvö hvort annað meðal annars um andlegt og líkamlegt ofbeldi í garð hins. Þau byrjuðu saman í lok árs 2011, giftu sig árið 2015 og skildu fimmtán mánuðum síðar. 

Í hlaðvarpinu ítrekar Delevingne að hún og Heard hafi bara verið vinkonur á meðan hin síðarnefnda var gift Johnny Depp. Hann hafi hins vegar verið sturlaður af afbrýðissemi út í vináttu þeirra. 

„Það var ekkert að gerast á milli okkar á þeim tímapunkti. Síðar, eftir að þau skildu, þá gerðist eitthvað,“ svaraði Delevingne í hlaðvarpinu og segir að hún og leikkonan hafi verið nánar í langan tíma áður en ástarsambandið hófst. 

„Þegar þau voru að skilja þá fórum við að „flækjast saman“, en Heard var líka að „flækjast saman“ við aðra,“ bætti hún við og átti þar við Elon Musk, sem Heard var í sambandi með frá 2016-2017.