Deildi rúmi með pabba og fékk stuðning veikrar mömmu til að ná á toppinn

Yize flutti frá heimaborg sinni Lanzhou alla leið til Bretlands fyrir sex árum, þegar hann var aðeins 16 ára, ásamt pabba sínum í von um að láta drauma sína rætast í snókerheiminum. Móðir hans varð hins vegar eftir heima og var Yize himinlifandi í gær með að hafa unnið heimsmeistaratitilinn með báða foreldra á svæðinu.

„Mamma mín var mjög lengi ekki við góða heilsu. Þegar við vorum í Sheffield þá var hún mikið á spítalanum. Hún er eilíf uppspretta styrks fyrir mig,“ sagði Yize eftir sigurinn í gær, samkvæmt BBC.

„Henni líður mikið betur núna. Þetta er aðeins í annað sinn sem að hún heimsækir mig til Bretlands. Ég held að í framtíðinni fái ég hana til að vera oftar mér við hlið hérna.

Hún fórnaði öllu fyrir mig. Á sínum tíma sagði hún við mig: „Ekki koma aftur heim, ég get séð um allt hérna.“ Þá var ég á öðru ári í spilamennsku hérna í Bretlandi. Á þeim tíma var ég svo lágt skrifaður að það var alveg nauðsynlegt fyrir mig að spila og ná góðum úrslitum til þess að fá að halda áfram í atvinnumennskunni. Hún er mér allt,“ sagði Yize.

Gæti drottnað yfir íþróttinni næstu árin

Á blaðamannafundinum í gær sagði hann einnig frá því að þegar þeir feðgar hefðu flutt til Sheffield hefðu þeir þurft að deila rúmi í gluggalausri íbúð. Nú er Yize orðinn sá besti í heimi og það kemur þeim sem fylgst hafa með ferli hans ekki á óvart.

„Þessi strákur er algjörlega framúrskarandi. Ég hef þekkt Wu í nokkur ár, þekkt pabba hans í mörg ár, og séð baráttuna fyrir því að komast á þennan stall,“ sagði Jason Ferguson, formaður alþjóða snókersambandsins, sem hefur mikla trú á að Yize verði goðsögn í íþróttinni.

„Þú trúir ekki hvað það þýðir fyrir þessa fjölskyldu að vera í raun og veru á þessum vettvangi og halda á þessum bikar. Þetta er alveg ótrúleg stund. Við erum að sjá straumhvörf og þau verða að eiga sér stað.

Wu er núna raunverulega að ganga inn í það tímabil að verða einn af þeim bestu, þar sem hann getur haldið áfram og sigrað, sigrað og sigrað,“ sagði Ferguson.