Sprota­fyrir­tæki í al­var­legri stöðu

Fréttastofa greindi frá því í vikunni að húðvörufyrirtækið Bioeffect hafi stefnt Rannsóknamiðstöð Íslands, eða Rannís, vegna synjunar á umsókn félagsins um framlengingu skattafrádráttar vegna rannsókna og þróunar. Fregnir hafa borist af því að fjölmörg nýsköpunarfyrirtæki hafi átt erfitt með að sækja endurgreiðslur til Rannís, sem þar til fyrir skömmu voru auðsóttar. 

Þór Sigfússon, framkvæmdastjóri nýsköpunarmiðstöðvarinnar Íslenska sjávarklasans, segist heyra af því að staðan sé að hafa alvarleg áhrif á fyrirtæki og að um töluverðan hóp þeirra sé að ræða.

„Við höfum orðið mjög vör við þetta hjá Sjávarklasanum og í þessu frumkvöðlaumhverfi og þetta er auðvitað mjög alvarlegt. Þetta eru oft fyrirtæki sem þurfa ekki á meiri óstöðugleika að halda,“ segir Þór.

Mörg þessara fyrirtækja séu að ryðja brautir fyrir Ísland og fyrirtæki hafi ekki lagt eins mikið fjármagn í þróunar- og rannsóknarvinnu í áratugi.

Þurfi að standa við gefin orð

„Þetta eru fyrirtæki sem mörg hver blómstra síðar meir og búa til gríðarlega fjármuni og verðmæti fyrir íslenskt samfélag. En þetta er nýtt fyrir Ísland og það er kannski það sem er flókið í þessu núna, það er eins og það sé ekki skilningur á því hversu brýnt það er að við séum að fylgja þessum fyrirtækjum eftir með því að standa við þau orð sem gefin voru um að endurgreiðsla skyldi eiga sér stað með hliðsjón af þeim skilyrðum sem sett voru. Og þessi fyrirtæki telja sig langflest eða öll vera að uppfylla þessi skilyrði sem sett eru.“

Sviðstjóri hjá Samtökum iðnaðarins kallaði í vikunni eftir því að stjórnvöld drægju úr óvissu og benti á að tækni- og hugverkafyrirtæki hefðu á síðasta ári skilað þjóðarbúinu meiri útflutningstekjum en sjávarútvegurinn. 

Þór segist engar haldbærar skýringar hafa heyrt á breyttri framkvæmd.

„Ég bara óttast að í þessu eins og svo mörgu öðru sé skrifræðið að aukast á Íslandi og við þurfum að passa upp á það.“

„Ég held að stjórnvöld þurfi bara að setjast aðeins niður með þessum stofnunum og spá í það hvernig hægt sé að einfalda þetta og gera þetta þannig úr garði að það sé sómi að fyrir alla,“ segir Þór Sigurfússon, framkvæmdastjóri Íslenska sjávarklasans.