„Nú er serían komin aftur á núll“

Jóhann Þór Ólafsson, þjálfari Grindavíkur, var sáttur í leikslok og hló þegar blaðamaður spurði hvort þessi sigur hefði nokkurn tímann verið í hættu.

„Þetta var bara stál í stál allan tímann og við lentum réttu megin við línuna, ég held að það sé bara hægt að orða það þannig. Þetta gat endað á hvorn veginn sem er og sem betur fer fyrir okkur þá erum við sigurvegarar hér í kvöld.“

Grindvíkingar litu ekki vel út framan af leik en hófu seinni hálfleikinn á 10-2 áhlaupi. Jóhann viðurkenndi að hann hefði aðeins látið sína menn heyra það í hálfleik.

„Ég æsti mig aðeins en það var bara miðvikudagsfnykur af þessu lungan úr fyrri hálfleiknum. Svo bítum við frá okkur mætum þannig lagað séð klárir í seinni hálfleikinn. En við fáum fullt af sénsum til að slíta þá frá okkur og bara klára þetta en það einhvern veginn gekk ekki. Njarðvíkingarnir bara mjög góðir og skipulagðir og allt það. Eins og ég segi, þá endum við bara réttu megin við línuna.“

Þá viðurkenndi Jóhann fúslega að það væri þunga fargi af honum létt að vera búinn að jafna einvígið.

„Algjörlega. Við náttúrulega mætum hérna með bakið upp við veginn, þurftum sigur og það tókst. Torsótt var það en sigur er sigur og við tökum það. Nú er serían komin aftur á núll og við þurfum að vinna tvo leiki. Nú er það bara gamla góða, endurheimta eins mikið og hægt er og mæta klárir á föstudaginn.“

Næsti leikur er föstudagsleikur í Grindavík og Jóhann reiknar með að Grindvíkingar fjölmenni á völlinn.

„Vel mætt hér í kvöld og bara hrós á okkar fólk. Stóðu sig virkilega vel. Ég hef fulla trú á að það verði góður fössari heima í Grindavík. Fullt hús og stemming.“