Doncic missir mögu­lega af öllum verð­launum vegna meiðsla

Enn er verið að meta alvarleika meiðslanna sem Doncic varð fyrir í nótt. Hann fór meiddur af velli í þriðja leikhluta í 139-96 tapi gegn ríkjandi meisturum Oklahoma City Thunder.

Fyrir þennan leik hafði Doncic verið að spila stórkostlega. Lakers unnu fimmtán leiki í marsmánuði en töpuðu aðeins tveimur, sem kom liðinu upp í þriðja sæti vesturdeildarinnar. Í leikjum án Doncic hafa Lakers unnið sjö og tapað sex leikjum.

Þetta var 64. leikur Doncic á tímabilinu en hann missir líklega af síðustu fimm leikjunum á næstu tíu dögum fyrir úrslitakeppni, vegna meiðslanna sem hann varð fyrir í nótt.

Þar með er hann ógjaldgengur til einstaklingsverðlauna, eins og MVP verðlaunanna fyrir verðmætasta leikmanninn. Til þess að fá þau verðlaun þurfa leikmenn að spila að minnsta kosti 65 leiki.

Doncic er stigahæsti leikmaður deildarinnar, með 33.5 stig að meðaltali í leik, auk 8.3 stoðsendinga og 7.7 frákasta. Hann þótti meðal fimm líklegustu leikmanna til að vinna MVP verðlaunin. Líklegast mun þó annað hvort Nikola Jokic eða Shai Gilgeous-Alexander vinna þau verðlaun.

Vegna 65 leikja reglunnar verður Doncic ekki heldur gjaldgengur í All-NBA úrvalsliðin, ef hann spilar ekkert í síðustu fimm leikjunum. Allt saman hefur þetta áhrif á framtíð hans hvað samninga varðar, samningar geta orðið stærri því oftar sem leikmenn eru verðlaunaðir.

Cade Cunningham og Anthony Edwards eru í sömu stöðu og Doncic gæti lent í. Þeir munu ekki ná að spila 65 leiki á tímabilinu en hefðu annars eflaust verið valdir í All-NBA lið.