Engar fækkanir fyrir­hugaðar fari kaupin í gegn

Icelandair hefur undirritað viljayfirlýsingu um að hefja viðræður um möguleg kaup á 49 prósenta hlut í félaginu Fly Play Europe, sem er skráð á Möltu og er með flugrekstrarleyfi þar. Félagið var dótturfélag Play sem fór í þrot á síðasta ári og er í eigu íslenskra fjárfesta, þar á meðal lífeyrissjóða. 

Bogi Nils Bogason forstjóri Icelandair segir að þeir sem halda á félaginu í dag hafi haft samband.

„Með slíkum kaupum erum við að búa til ákveðinn sveigjanleika og frekari tækifæri fyrir okkar starfsemi. Til dæmis loftleið í leiguflugi okkar sem gengur mjög vel og er mikilvægur þáttur í okkar starfsemi. Ef þetta gengur í gegn erum við komin með fleiri vörur í búðaborðið,“ segir Bogi. 

Aðspurður um hvort að Icelandair hyggist ráða flugáhafnir eða starfsfólk í þjónustuver á Möltu fari kaupin í gegn svarar Bogi:

„Varðandi þjónustuver höfum við verið með slíka starfsemi hér heima og erlendis. Það er engin breyting fyrirhuguð varðandi það. Hvað varðar áhafnir þá er starfsemi okkar fyrst og fremst  hér á landi og verður það áfram.“

Engar fækkanir fyrirhugaðar

Ekki sé því fyrirhugað að fækka starfsfólki hér á landi fari kaupin í gegn.

„Við sjáum það ekki í stöðunni núna að starfsfólki verði fækkað.  Við erum að fara í gegnum breytingar á flotanum okkar núna. Við erum að taka inn nýjar vélar og út fara eldri vélar. Það skapast hugsanlega tækifæri hvað það varðar, þ.e. að aðgreina flotann betur sem skilar sér í einfaldari rekstri og hagræðingu. En þetta er allt á frumstigi og viðræður að hefjast,“ segir Bogi. 

Bogi segir að enn sé ekki byrjað að ræða um kaupverð. Fremur sé þó talað um verð í milljónum en milljörðum króna. 

„Viðræðurnar munu taka einhvern tíma, mögulega einhverjar vikur. Ég get ekki gefið neitt upp um verðið á þessu stigi,“ segir Bogi.

Þrotabúið fær sinn skerf

Arnar Þór Stefánsson skiptastjóri þrotabús Fly Play staðfestir að drög að samkomulagi liggi fyrir við skuldabréfaeigendur varðandi dótturfélagið á Möltu. Samkvæmt því muni þrotabúið meðal annars fá tiltekna hlutdeild í ávinningi af fyrirhuguðum viðskiptum. Skiptastjóri hafi metið það svo að rétt sé að freista þess að gera slíkt samkomulag til hagsbóta fyrir búið fremur en leysa úr ágreiningi fyrir dómi. Samkomulagið verði til umfjöllunar á skiptafundi í þrotabúinu sem haldinn verði seinnipart mánaðarins.