Boða skatt­heimtu á fjár­mála­fyrir­tæki án út­færslu

Þetta kemur fram í svörum ráðuneytis Daða Más Kristóferssonar við fyrirspurnum Vísis. Í fjármálaáætlun, sem kynnt var í síðustu viku, er aðeins kveðið á um að afla eigi „viðbótarskatttekna frá fyrirtækjum í fjármálageiranum“ án frekari skýringa.

Fyrirtæki í geiranum greiða nú þegar sérstaka skatta á skuldir, laun og hagnað, en ekki liggur fyrir hvort eigi að hækka þá skatta eða leggja á nýja.

Engar tölur eða útfærsla

Í svörum ráðuneytisins segir að umræddar ráðstafanir séu enn á hugmyndastigi og bíði útfærslu í fjárlögum hvers árs. Af þeim sökum liggi hvorki fyrir sundurliðun á tekjum né mat á því hversu miklu eigi að safna.

Þá hefur heldur ekki verið lagt mat á áhrif mögulegrar skattheimtu á vexti eða lánskjör almennings. Slíkt mat á að fara fram við gerð fjárlaga 2027 í haust.

Segir 6 milljarða ekki eiga stoð í áætluninni

Óvissan um umfangið hefur þegar orðið að pólitísku hitamáli. Framkvæmdastjóri þingflokks Samfylkingarinnar, Þórður Snær Júlíusson, hefur fullyrt að bankaskatturinn eigi að skila um 6 milljörðum króna árlega.

Daði Már hefur hins vegar hafnað því í samtali við Morgunblaðið og sagt slíkar tölur ekki eiga sér stoð í fjármálaáætluninni.

Samkvæmt umfjöllun Morgunblaðsins segir ráðherrann að engin fjárhæð sé tilgreind í opinberum gögnum og að allar útfærslur séu enn eftir. Því sé um misskilning að ræða að slíkar tekjur liggi þegar fyrir.