Árni nýr stjórnar­for­maður Íslandsstofu

„Íslenskt hagkerfi byggir á útflutningi og hlutverk Íslandsstofu er að vinna með öllum útflutningsgreinum að því að auka hann. Á undanförnum árum hefur fjölbreytni í útflutningi aukist og samsetning útflutnings því breyst frá fyrri tíð, sem hefur rennt stoðum undir aukinn stöðugleika í íslenska hagkerfinu. Ég er afar spenntur að taka við sem formaður stjórnar Íslandsstofu á þeim áhugaverðu tímum sem fram undan eru í öllum fjórum stoðum útflutnings; sjávarafurðum, hugverkaiðnaði, ferðaþjónustu og orkusæknum iðnaði. Hjá Íslandsstofu starfar öflugur hópur sem ég hlakka til að vinna með að þeim verkefnum sem fram undan eru,“ er haft eftir Árna í tilkynningu.

Þar kemur fram að Árni hafi verið formaður Samtaka iðnaðarins árin 2020 til 2026 og hefur átt sæti í stjórn og framkvæmdastjórn Samtaka atvinnulífsins frá 2016. Árni er stjórnarformaður Reita hf., á sæti í Háskólaráði Háskólans í Reykjavík og hefur setið í fjölda stjórna annarra fyrirtækja og samtaka. Hann lauk embættisprófi í lögfræði frá Háskóla Íslands og meistaraprófi í fjármála- og félagarétti frá London School of Economics and Political Science (LSE).

Sigríður Mogensen tekur einnig sæti í stjórninni samkvæmt tilkynningunni. Hún er sviðsstjóri iðnaðar- og hugverkasviðs Samtaka iðnaðarins og situr í ráðgjafarnefnd EFTA og EES, stjórnum KLAK – Icelandic Startups og Nýsköpunarsjóðsins Kríu. Sigríður er með B.Sc. í hagfræði frá Háskóla Íslands og M.Sc. í reikningshaldi og fjármálum frá London School of Economics (LSE). Hún starfaði áður hjá Deutsche Bank í Lundúnum sem og á Viðskiptablaðinu og Stöð 2 og hefur setið í ýmsum stjórnum og nefndum, meðal annars stjórn Júpíters og Gamma og áhættunefnd stjórnar Kviku banka.

Samhliða þessum breytingum gengu þær Hildur Árnadóttir, fráfarandi formaður, og Ásthildur Otharsdóttir úr stjórn Íslandsstofu, en þær höfðu báðar setið í stjórninni í átta ár. Stjórnina skipa auk Árna og Sigríðar þau  Eva María Þórarinsdóttir Lange, Heiða Kristín Helgadóttir, Helga Árnadóttir (varaformaður), Martin Eyjólfsson og Ægir Páll Friðbertsson.