Brimgarðar kaupa tíu milljónir hluta í Reitum

Með kaupunum eiga Brimgarðar því tæp sex prósent í fasteignafyrirtækinu sem gerir þau að stærstu einkaeigendum í fyrirtækinu. Fyrir áttu Brimgarðar rúmlega 31 milljón hluta en hafa fest kaup á tíu milljónum til viðbótar. Vert er að taka fram að engin efnisleg breyting er á stöðu félagsins heldur sé verið að færa bréf úr framvirkum samningi yfir í beina eign.

Í flöggun til Kauphallar segir að eign Brimgarða í Reitum nemi nú 5,93 prósentum.

Systkinin sem kennd eru við Mata, Guðný Edda, Eggert Árni, Gunnar Þór og Halldór Páll Gíslabörn eru eigendur Brimgarða, sem er dótturfélag Ölmu íbúðafélags hf. Þá eru systkinin einnig eigendur Langasjós ehf.

Þegar eiga Brimgarðar rúmlega tuttugu prósenta hlut í fasteignafélaginu Eik og sömuleiðis á Langisjór rúm þrettán prósent. Fyrir rúmu ári síðan keyptu Brimgarðar hluti í Eik fyrir 238 milljónir króna.

Fréttin hefur verið leiðrétt. Áður stóð að einungis tvö systkinanna væru eigendur Brimgarða en rétt er að öll fjögur systkinin eru eigendur. Þá er nú tekið fram að verið er að færa bréf úr framvirkum samningi yfir í beina eign.