Rússíbanareið á mörkuðum vegna rangs tísts

Ráðherrann hélt því fram í tísti í gær að sjóher Bandaríkjanna hefði fylgt olíuflutningaskipi gegnum Hormuz-sund. Það hefði verið gert til að tryggja hefðbundið flæði olíu á mörkuðum.

Strax í kjölfarið féll olíuverð hratt og verðbréfamarkaðir tóku kipp upp á við, eins og bent er á í frétt Wall Street Journal. Þegar mest var hafði verð olíu í Bandaríkjunum lækkað um nítján prósent.

Tístið hvarf þó nokkrum mínútum síðar þar sem það reyndist rangt. Talsmaður orkumálaráðuneytisins sagði starfsmann hafa skrifað rangan texta við tístið og því hefði það verið fjarlægt. Verið væri að skoða ýmsar leiðir til að opna Hormuz-sund, þar á meðal þá leið að fylgja olíuflutningaskipum með herskipum.

Olíuverðið hækkaði aftur en náði ekki sömu hæðum. Dow Jones-vísitalan hafði hækkað um eitt prósent í gær en endaði viðskiptadaginn á því að hafa lækkað um 0,1 prósent.

Forsvarsmenn eins fjárfestingasjóðs segjast hafa tapað 84 milljónum dala á tísti Wrights.

„Þetta er ófyrirgefanlegt,“ sagði einn þeirra við WSJ.

Karoline Leavitt, talskona Donalds Trump, staðfesti fljótt eftir að tísti Wrights var eytt að engu olíuflutningaskipi hefði verið fylgt gegnum sundið. Í kjölfarið sagði hún Trump staðráðinn í því að halda sundinu opnu.

Hormuz-sund er þó ekki opið.

Rúmlega fimmtungur olíu og jarðgass heimsins fer um Hormuz-sund en þar að auki fara fjölmörg flutningaskip um svæðið. Siglingar þar í gegn hafa verið mjög takmarkaðar síðan Bandaríkjamenn og Ísraelar hófu árásir sínar á Íran fyrir um tólf dögum síðan.

Ráðamenn í Íran hafa heitið því að leyfa ekki siglingar olíuflutningaskipa um sundið vegna árásanna.

Áhafnir fjölmargra skipa bíða sitt hvoru megin við sundið en ráðist var á að minnsta kosti þrjú þeirra í nótt. Eldur kviknaði um borð í einu, eftir að það virðist hafa orðið fyrir annaðhvort eldflaug eða dróna, og þurfti áhöfnin að yfirgefa skipið.

Erfitt og dýrt að fylgja skipum

Það að fylgja olíuflutningaskipum gegnum Hormuz-sund með herskipum þykir sérfræðingum ekki líklegt til árangurs. Það myndi setja bandarísk herskip, sem eru þegar notuð til að verja tvö flugmóðurskip á svæðinu, í mikla hættu og jafnvel auka líkurnar á árásum á olíuflutningaskip.

Hormuz-sund er mjög þröngt og gefur írönskum hermönnum færi á að beita ýmsum vopnum gegn skipum sem fara þar um. Þeir geta notað eldflaugar, hefðbundið stórskotalið og tundurdufl, svo eitthvað sé nefnt.

Í samtali við Economist segja nokkrir sérfræðingar að það myndi reynast Bandaríkjamönnum mjög erfitt og dýrt að fylgja skipum gegnum sundið og tryggja öryggi þeirra. Þá benda þeir meðal annars á það að herskip séu að sumu leyti viðkvæmari en olíuflutningaskip.

Þau síðarnefndu séu til að mynda búin skrokkum og á árum áður hafi herskipum verið siglt á eftir olíuflutningaskipum þar sem hætta er vegna tundurdufla.

Þá nefna sérfræðingarnir að Hútar hafi lokað skipasiglingum um Rauðahaf í fyrra. Þá gerðu Bandaríkjamenn árásir sem ætlað var að opna fyrir siglingar þar aftur en það reyndist erfitt. Árásirnar enduðu með einskonar vopnahléi en siglingar um Rauðahaf hafa ekki náð sömu hæðum aftur. Hútar heita því nú að hefja aftur árásir vegna árásanna á Íran.