Affineva bar sigur úr býtum

Verðlaunin voru afhent í gær á lokakeppni Gulleggsins en um er að ræða stærstu og elstu frumkvöðlakeppni Íslands. Tíu sprotateymi kynntu hugmyndir sínar fyrir áhorfendum og dómnefnd.

Í ár tók þátt fjölbreyttur hópur teyma sem spannar allt frá líftækni og sjálfbærri orku yfir í stafrænar lausnir og nýjar leiðir til að nýta gögn, tækni og íslenskar auðlindir og samkeppnin var því mikil.

Affineva hlaut tvær milljónir króna í verðlaun frá Landsbankanum en í öðru sæti var teymið IORDEN sem er með lausn sem nýtir gervigreind og sjálfvirkni til að einfalda og bæta gæðaeftirlit hjá smærri matvælaframleiðendum. Þau fengu eina milljón króna í verðlaun. Norrestone hreppti þriðja sætið en verkefni þeirra gekk út á stafrænt vistkerfi fyrir skartgripi.

„Teymin í Gullegginu í ár sýna enn og aftur hversu fjölbreytt og öflug nýsköpun er á Íslandi. Hér eru frumkvöðlar að leysa raunveruleg vandamál, skapa ný verðmæti og leggja sitt af mörkum til sjálfbærari framtíðar,“ er haft eftir Önnu Schalk Sóleyjardóttur, verkefnastjóra Gulleggsins, í fréttatilkynningu.

Heiðursegg Gulleggsins var veitt fyrirtækinu Lavashow en hugmyndin á bak við fyrirtækið var meðal þeirra tíu hugmynda sem kepptu um Gulleggið árið 2016. Lavashow hefur á síðustu árum vakið mikla athygli fyrir að umbreyta náttúruöflunum í einstaka upplifun fyrir gesti, byggja upp sterkt vörumerki og skapa verðmæti bæði í ferðaþjónustu og skapandi greinum.

„Með heiðursegginu er viðurkennt það mikla frumkvöðlastarf, úthald og hugrekki sem liggur að baki því að byggja upp fyrirtæki eins og Lavashow,“ segir í fréttatilkynningu.

Þessi tíu teymi kepptust um Gulleggið.

Affineva: Markmið Affineva er að þróa sértækar líftæknilausnir í greiningu og meðhöndlun sjúkdóma.

Araxni: Líftækniframleitt köngulóarsilki fyrir sjávarútveg, textíl og fleira. Vefjum nýja framtíð - úr silki ekki plasti.

Dýragáttin: Dýragáttin er eins og Heilsuvera fyrir dýr. Þar er hægt að finna allar upplýsingar um bólusetningar, örmerkingar, dýralæknaheimsóknir og annað sem tengist dýrunum okkar.

E-Lísa: E-Lísa dregur úr áhættu í jarðvarmaþróun og tryggir að borholur skili áreiðanlegum og fyrirsjáanlegum afköstum.

IORDEN: Hagkvæmur og sjálfvirkur gæðastjóri sem gerir smærri matvælaframleiðendum kleift að vera með allt IORDEN.

Le Bát: Afhendum sjávargögn á sjálfbæran máta

Norrstone: Stafrænt vistkerfi fyrir vottun, tryggð viðskiptavina, tryggingar og endursölu skartgripa.

Ókind: Ókind notar líftækni til að þróa nýtt efni úr íslenskri ull.

Replay! The Musical: Söngleikja-og „hryntölvuleikur“ þar sem þú, leikmaðurinn, ferð með aðalhlutverkið.

STRUX: Markmið STRUX er að einfalda og hraða ferli byggingarleyfa.