Ís­lendingarnir sem fá ekki að spila fyrir Ís­land

Það er töluvert ferli sem fylgir því að leikmenn fái að spila fyrir landsliðið þrátt fyrir að þeir Jaka Brodnik og Davis Geks hafi verið komnir með íslenskt vegabréf. Vinna þarf það í samvinnu við körfuknattleikssambönd heimaþjóða þeirra, í þessu tilfelli Slóveníu og Lettlands.

Samböndin gefa leyfi fyrir því að þeir skipti um þjóðerni innan körfuboltans og því næst þarf samþykki Alþjóðakörfuknattleikssambandsins, FIBA.

Það fékkst ekki þó að þeir félagar hafi aldrei spilað A-landsleik fyrir fyrri þjóðir.

„Þeir neita á þeim grundvelli að þessir leikmenn hafi spilað of marga leiki fyrir U20 landslið síns lands. Að þeir hafi spilað fleiri en fimm leiki. FIBA neitar þar af leiðandi umsókninni,“ segir Baldur Þór Ragnarsson, aðstoðarlandsliðsþjálfari, í samtali við Sýn.

„Því er áfrýjað í aðra nefnd og þaðan kemur endanleg neitun. Ísland fær ekki að nota þessa tvo leikmenn í landsleikjum,“ bætir hann við.

Starfsfólk KKÍ og landsliðsþjálfararnir tóku tíðindunum eðlilega ekkert sérlega vel. Dæmi séu um að menn hafi spilað fyrir tvö A-landslið, og sérkennilegt sé að unglingalandsleikir fyrir mörgum árum síðan vegi svo þungt.

„Maður hefur séð í gegnum tíðina menn að spila A-landsleiki og svo skipta um landslið. Auðvitað getum við spurt hvort við séum litli kallinn og sé verið að traðka á okkur. En þetta er niðurstaðan sem við erum með í höndunum og það er bara þannig,“ segir Baldur.

Bandaríkjamaðurinn Jordan Loyd, sem fór illa með Ísland á EuroBasket í haust, gerði það með pólska landsliðinu. Loyd, sem varð NBA-meistari með Toronto Raptors árið 2019, hafði aldrei búið eða yfirhöfuð spilað körfubolta í Póllandi.

Honum var afhentur ríkisborgararéttur eftir meiðsli Jeremy Sochan, leikmanns Póllands, skömmu fyrir EM og fékk leyfi frá FIBA á mettíma fyrir mótið.

Mættu sama leikmanni með Slóvakíu og Þýskalandi

Frjálslegar ferðir eru milli landsliða í handbolta en í fótbolta er regluverkið skýrt og ekki má spila fyrir tvær þjóðir nema í sérstökum undantekningatilfellum.

Í fótbolta hafa unglingalandsleikir hins vegar engin áhrif á val leikmanna á A-landsliðum og til fjölmörg dæmi um leikmenn sem hafa spilað fyrir unglingalandslið evrópskrar stórþjóðar en A-landslið fyrrum nýlendu.

„Mér persónulega finnst þetta mjög óljóst. Það er bara eins og þetta er. Eins og þegar Bandaríkjamenn fá vegabréf á einni viku og byrja að spila. Svo eru þetta leikmenn sem eru búnir að vera hérna í lengri tíma, þá sérstaklega Jaka, en er neitað um að spila. Auðvitað finnst manni það sérstakt,“

„Maður upplifði það fyrir nokkrum árum að leikmaður spilaði á móti okkur með Slóvakíu og spilaði svo á móti okkur með Þýskalandi. Þannig að klárlega er þetta óljóst. En þetta eru svörin sem sérsambandið hefur fengið,“ segir Baldur.

Ísland mætir Litáen í undankeppni HM í Laugardalshöll á föstudagskvöldið klukkan 19:30.