„Okkur líður vel og við erum að spila vel“

„Góður sóknarleikur af okkur hálfu. Við vorum fínir í vörn svona mest megnis af leiknum líka“ sagði Þórir Guðmundur Þorbjarnarson eftir sigurinn í kvöld.

„Við vorum að byggja upp fínar f0rystur en vorum ekki alveg nógu duglegir að halda því. Við hleyptum þeim svolítið inn í leikinn í fjórða en ég er bara virkilega ánægður með að vinna leikinn“

KR var að hitta gríðarlega vel fyrir aftan þriggja stiga línuna í kvöld.

„Sérstaklega í fyrsta leikhluta, ég held að við höfum sett einhverja 8-9 þrista í fyrsta leikhluta og okkur leið vel“

„Við vorum að fá mikið af opnum skotum og vorum að setja þau niður. Það svona setti tóninn snemma fyrir okkur og við náðum að byggja ofan á það“

KR fór með öfluga forystu inn í fjórða leikhluta sem á endanum reyndist bara of mikil fyrir Njarðvikinga.

„Ég held að í þriðja leikhluta þá náðum við þessu upp í nítján og vorum að vinna með nítján fyrir fjórða. Það er fín forysta en við vorum svona aðeins að reyna halda henni í staðin fyrir að spila bara okkar leik og þeir náðu þessu aðeins niður“

KR unnu í kvöld sinn áttunda sigur í röð en Þórir vill þó ekki meina að KR-ingum líði eins og þeir séu ósigrandi þrátt fyrir það.

„Nei, okkur líður vel og við erum að spila vel. Við undirbúum okkur alltaf bara vel fyrir hvern einasta leik og bara virkilega gott að ná sigri núna einmitt svona rétt fyrir pásu þannig við erum bara mjög glaðir með það“

„Við fáum svo fjóra flotta leiki hérna eftir pásuna og mætum tilbúnir í þá“ sagði Þórir Guðmundur Þorbjörnsson.