Síminn tekur upp nýtt nafn og hagnast um 1,6 milljarða

„Það er viðeigandi að næsti kafli í sögunni hefjist á þessum tímapunkti. Þannig er unnið að breyttu skipulagi samstæðunnar og færslu fjarskipta- og miðlareksturs í nýtt dótturfélag. Það er ánægjulegt að tilkynna að hið nýja móðurfélag mun bera heitið Ásar,“ segir María Björk Einarsdóttir forstjóri í tilkynningu til Kauphallar. 

Síminn rekur í dag til að mynda bókunarþjónustuna Noona, auglýsingaskiltafyrirtækið Billboard og fjártækni- og lánafyrirtækið Síminn Pay. Einnig hefur Síminn fest kaup á Greiðslumiðlun Íslands, Opnum kerfum og Öryggismiðstöð Íslands en viðskiptin eru öll háð samþykki Samkeppniseftirlitsins.

„Markmiðið er að ná umtalsverðri samlegð, hámarka árangur hvers félags og greiða leið frekari vaxtar. Þessar breytingar eru fyrirhugaðar á tímamótaári, en Síminn fagnar 120 ára afmæli í haust,“ bætir María við.

Samið við Sýn um dreifingu á Enska boltanum

María segir að nýverið hafi verið samið við Sýn um heildsölu og dreifingu sjónvarpsefnis en fyrirtækin hafa deilt um rétt Símans til að dreifa útsendingum frá Ensku úrvalsdeildinni í fótbolta og öðru efni sem Sýn er rétthafi að. Síminn segir að með samkomulaginu sé búið að útrýma óvissu í málinu.

Heildartekjur Símans hf. árið 2025 námu 28,77 milljörðum króna og jukust tekjur um 3,4 prósent frá fyrra ári. Munar þar mestu um aukningu í auglýsingatekjum og tekjum tengdum fjártækni, að því er fram kemur í ársreikningi. 

Afkoma félagsins á fjórða ársfjórðungi var innan útgefins spábils og EBITDA var í efri mörkum, að sögn forstjóra. 

Vilja greiða 500 milljónir í arð

Eiginfjárhlutfall Símans var 38,6 prósent í árslok 2025 og eigið fé 17,1 milljarðar króna. Heildarniðurstaða ársins, án afskrifta vegna dóms í máli Samkeppniseftirlitsins gegn Símanum, var 3,28 milljarðar króna og var innan síðustu afkomuspár, að sögn stjórnenda. Hæstiréttur sneri í fyrra við dómi Landsréttar og sektaði Símann um 400 milljónir króna vegna brota á samkeppnislögum í tengslum við sölu á útsendingum frá Enska boltanum.

„Stjórn félagsins leggur til að greiddur verði arður að fjárhæð 500 m.kr. á árinu 2026. Óskað verður eftir áframhaldandi heimild til endurkaupa eigin bréfa fyrir allt að 10% af hlutafé,“ segir í ársreikningi Símans. Í mars 2025 var samþykkt að heimila stjórn að kaupa hlutafé félagsins fyrir allt að 247,5 milljónir króna að nafnverði.

Tíu stærstu eigendur samstæðunnar eru fjárfestingafélagið Stoðir hf. og íslenskir lífeyrissjóðir sem fara samanlagt með um 66 prósenta eignarhlut. 

Vísir er í eigu Sýnar. Fréttin hefur verið uppfærð.