„Byrjunin verður gríðar­lega mikil­væg“

„Það er búið að vera fínn stígandi í þessu hjá okkur hérna eftir áramót. Við höfum náð að setja saman nokkra sigra í röð og mér finnst liðið svona vera að koma vel saman núna. En þetta er bara risaleikur og á móti mjög góðu liði,“ segir Jakob Örn Sigurðarson þjálfari KR í hádegisfréttum Bylgjunnar.

En hvernig ætlar Jakob að koma KR-liðinu í úrslit bikarsins annað árið í röð?

„Byrjunin verður gríðarlega mikilvæg. Við vitum alveg að Stólarnir munu koma mjög aggressívir til leiks og reyna svolítið að keyra upp stemninguna frá byrjun þannig að við þurfum að vera tilbúnir í byrjun og svo náttúrulega að ná að stjórna hraðanum og hægja svolítið á þeim í gegnum allan leikinn.“

Stuðningsmenn Stólanna eru þekktir fyrir að vera öflugir í stúkunni en það eru líka stuðningsmenn KR-inga. Það mætti alveg gera ráð fyrir frábærri stemningu í Smáranum í kvöld.

„Ég býst við því. Við vorum náttúrulega í bikarúrslitum í fyrra og vorum með frábæra mætingu þar og stuðningsmenn okkar gerðu gríðarlega vel og ég býst ekki við öðru í kvöld. Sérstaklega núna á móti Tindastól sem eru alltaf með mikið af fólki í stúkunni og mikil læti þannig að ég býst bara við gríðarlega góðri stemningu í stúkunni.“