Stig­mögnun í nágranna­erjum: „Hann vildi keyra á mig“

„Hann vildi keyra á mig á bílnum af því að ég var fyrir framan búðina,“ segir Yusuf Koca, eigandi Istanbul Market, í samtali við fréttastofu og vísar þar til Dara Ako Ali, annars eigenda BK Kjúklings. 

Dara hafnar þessu og segir þetta ósannindi. Hann hafi raunar verið að reyna að leggja bíl sínum fyrir utan verslunina þegar Yusuf hafi sett innkaupakörfu í stæðið. Dara hafi fjarlægt hana í kjölfarið og lagt bílnum eins og til stóð.

Á sama tíma sakar Dara hann Yusuf um að hafa farið illum orðum um fjölskyldu sína en Yusuf segir þetta af og frá.

Stigmögnun í langri deilu

Á fimmtudag birtist færsla á Facebook-síðu Istanbul Market þar sem greint var frá því að tveir bílar sem hafi verið lagt beint fyrir framan inngang verslunarinnar tilheyrðu eiganda BK Kjúklings. Ökutækjum væri lagt þar daglega og eigandi BK neitað að fjarlægja ökutækin. Í ljósi þessa eigi rekstraraðilar Istanbul Market þann einn kost að „ráðast í lögræðilegar aðgerðir“ til að fá bílana fjarlægða og krefjast bóta.

Dara, annar eigenda BK Kjúklings, er eðlilega ósáttur við færsluna. „Ég þarf að tala við lögfræðinginn minn. Þetta er mjög slæmt þetta sem hann er að gera núna,“ segir Dara. „Við ætlum að ráðast í lagalegar aðgerðir og við sjáum hver mun hafa betur.“

Hann segir deiluna þvert á móti hafa byrjað þegar Yusuf hjá Istanbul Market fór ítrekað að leggja bifreiðum hjá veitingastaðnum. Þá fyrst hafi hann svarað auga fyrir auga.

Dara segir borgaryfirvöld hafa staðfest að bílastæðin fyrir framan Istanbul Market séu borgarland og honum sé því heimilt að leggja þar löglegum ökutækjum eins lengi og hann vilji. Aftur á móti séu stæðin við BK Kjúkling í hans einkaeigu og því einungis ætluð viðskiptavinum og starfsmönnum. Þrátt fyrir þetta hafi hann ekki viljað fara í hart og láta draga bifreiðar Yusuf af svæðinu.

Sakar Dara um ósannindi

Sjálfur segir Yusuf það af og frá að hann hafi hleypt af fyrsta skotinu. Það sé lygi og hann hafi einungis lagt örfáum sinnum í stæði BK Kjúklings.

Yusuf segir að borgaryfirvöld hafi ekkert gert í málinu og að hann vinni nú að því að eignast bílastæðið fyrir framan Istanbul Market til að koma í veg fyrir frekari misnotkun. 

Dara keypti rekstur BK Kjúklings á síðasta ári og segist allur af vilja gerður. 

„Ég hef átt þennan stað í sjö mánuði og ég vil vera nágranni allra og þú getur spurt mína nágranna. Okkur kemur mjög vel saman,“ segir Dara. Á sama tíma hafi Yusuf verið dónalegur við sig frá fyrsta degi.

„Hann byrjaði. Hann er með fimm bifreiðar og leggur þeim öllum fyrir framan minn stað þar sem ég myndi annars leggja. Ég þarf annaðhvort að fara að Bónus eða Krónunni til að leggja mínum bíl. Það er ekkert pláss.“ 

Um hafi verið að ræða þrjár bifreiðar á vegum eiganda Istanbul Market og aðrar á vegum sonar hans og starfsfólks. Þrátt fyrir þetta hafi Dara aldrei sagt honum að færa bílinn frá BK eða látið draga bifreiðarnar í burtu. Raunar hafi hann sagt lögmanni Yusuf að hann mætti leggja við veitingastaðinn sinn, þrátt fyrir að hann ætti landið.

Vegna bifreiða Istanbul Market og ásóknar fólks í aðra þjónustu nærri veitingastaðnum segist Dara stundum eiga í vandræðum með að finna bílastæði hjá BK og endi á því að leggja hinum megin við götuna í laust stæði við Istanbul Market.

Allt farið á versta veg eftir að hann óskaði honum góðs gengis

Yusuf segir engan vafa á því að Dara hafi byrjað þessa löngu deilu. Þegar Ysuf hafi keypt rekstur BK Kjúklings hafi Dara byrjað á því að koma við hjá honum og óska honum til hamingju og góðs gengis. Svo hafi fljótlega syrt í álinn.

„Síðan eftir nokkrar vikur fór hann að leggja bílum alveg fyrir framan búðina mína, lengi eða allan daginn.“ Hann hafi þá bent honum á að það væru laus stæði fyrir framan BK. „Ég var mjög góður fyrst.“

Hann hafi fljótlega beðið Dara um að færa bílana og hann fallist á það í fyrstu en svo snúið aftur í stæðið. Yusuf hafi furðað sig á þessu og sagt honum að það væru örfá bílastæði fyrir framan Istanbul Market en mun fleiri við veitingastaðinn hinum megin við götuna. Í kjölfarið hafi hann boðið Dara að leggja í staðinn fyrir aftan verslunina sína.

„Hann sagði strax: „Nei, ég vil bara leggja hér.“ Ég spurði: „Bíddu, af hverju ertu að búa til svona vandamál?“ Hann er síðan búinn að vera reiður.“

Í kjölfarið hafi Yusuf svarað þessu með því að leggja bifreiðum sínum við BK Kjúkling. Yusuf segist þó einungis hafa lagt þar í nokkra daga.

Hindri vörumóttöku

Yusuf segir að síðar hafi Dara keypt gamlan hvítan sendibíl og lagt honum fyrir framan Istanbul Market þar sem hann hafi verið í þrjár vikur. Tvær biðreiðar séu nú beint fyrir framan inngang verslunarinnar og hamli bæði viðskiptavinum og vörumóttöku.

Því hafi Yusuf ákveðið að leita til lögfræðings. „Þetta gengur ekki svona.“ Sá hafi sent Dara bréf sem hafi í kjölfarið fært bifreiðarnar. Nokkrum dögum síðar hafi hann svo aftur byrjað að leggja fyrir framan Istanbul Market.

„Það var kannski laust fyrir fimmtíu bíla fyrir framan BK Kjúkling. Af hverju ertu að leggja hér?“ segir Yusuf. Þegar hann hafi boðið honum aftur að leggja frekar á stærra stæðinu fyrir aftan verslunina og vera þar allan daginn hafi Dara lýst því yfir að hann kjósi frekar að leggja fyrir framan búðina.

Vilji báðir búa við frið

Hvorugir þeirra segjast vilja eiga í deilum við nágranna sína.

„Ég sagði honum að við gætum verið vinir og góðir nágrannar en hann þyrfti að vera góður. En hann notaði ljótt orðalag,“ segir Dara en Ysuf sakar hann um að hreyta reglulega í sig blótsyrðum þegar þeir mætast fyrir framan búðina.

„Ég vil ekki eiga í átökum við hann eða neitt slíkt,“ segir Dara. „Ég sagði þeim bara að þetta væri minn réttur, þetta bílastæði er í opinberri eigu. Enginn getur stöðvað mig og ef það væri þinn réttur að fjarlægja mig þá værir þú búinn að því fyrir löngu,“ bætir hann við.

Ysuf segist hafa verið í fimmtán ár með verslun sína og aldrei lent í slíku veseni.

„Fyrst þegar ég talaði við hann þá sagði ég: „Dara, þú ert með fjölskyldu og ég er með fjölskyldu. Við verðum að vera góðir saman. Þú ert líka með fyrirtæki. Þú heldur með mér og ég held með þér,“ segir Ysuf en svo fór sem fór.