Skrá Styrkás í Kaup­höllina á næsta ári

Í fréttatilkynningu þess efnis segir að Hreinsitækni og HRT þjónusta hafi komið inn í rekstur Styrkáss frá 1. janúar 2026 og myndi fjórða kjarnasvið samstæðunnar á sviði umhverfis- og iðnaðarþjónustu. Fyrir hafi verið þrjú kjarnasvið í orku og efnavörum (Skeljungur), tækjum og búnaði (Klettur) og eignaumsýslu og leigustarfsemi (Stólpi).

Rekstrarhagnaður Styrkás eftir afskriftir (EBIT) sé áætlaður á bilinu 3.350 til 3.650 milljónir króna á árinu 2026.

„Með ákvörðun stjórnar hefst formlega undirbúningur fyrir skráningu Styrkás í kauphöll. Samþætting hefur gengið samkvæmt áætlun og stjórnarhættir taka nú þegar mið af viðmiðum sem gilda um skráð félög. Sterkur hluthafahópur stendur að félaginu þar sem saman fer blanda af leiðandi einkafjárfestum og stórum stofnanafjárfestum. Markmiðið með skráningu í kauphöll er að nýta kosti kauphallarinnar til frekari vaxtar,“ er haft eftir Ásmundi Tryggvasyni, forstjóra Styrkáss.

Þá segir að Styrkás hf. sé rekstrarfélag sem hafi verið stofnað árið 2022. Skeljungur, Klettur, Stólpi, Hreinsitækni og HRT þjónusta séu dótturfélög Styrkáss og saman myndi þessi félög samstæðu Styrkás. Það sé stefna félagsins að verða leiðandi þjónustufyrirtæki á fyrirtækjamarkaði með styrk til að þjónusta innviða- og atvinnuvegafjárfestingu á Íslandi.

„Markmið Styrkáss er að byggja ofan á sterkar stoðir með innri og ytri vexti kjarnasviða, sem eru orka og efnavara, tæki og búnaður, eignaumsýsla og leigustarfsemi og umhverfisþjónusta og iðnaður.“

Stærsti eigandi Styrkáss, með 38 prósenta eignarhlut, er Skel fjárfestingafélag hf.