Höfnuðu yfirtökutilboði Paramount

Forsvarsmenn Paramount Skydance hófu 8. desember fjandsamlega yfirtökutilraun á Warner Bros. Discovery. Það er eftir að stjórn síðarnefnda félagsins neitaði að selja það til Paramount og samþykktu frekar 72 milljarða dala tilboð frá Netflix.

Warner Bros var sett á sölu í október og greindi frá því þann 5. desember að þau hefðu samþykkt tilboð frá Netflix.

Fjallað er um málið á vef BBC og vísað í lagaleg grein frá Warner Bros þar sem kemur fram að tilboðið frá Paramount feli í sér fjölmargar og verulegar áhættur. Stjórnin hafnar þar harðlega þeirri hugmynd að Ellison-fjölskyldan, ein sú ríkasta í Bandaríkjunum, styðji tilboðið fjárhagslega. Fjölskyldan hefur samkvæmt frétt BBC náin tengsl við Donald Trump, forseta Bandaríkjanna.

Stjórn Warner Bros segir tilboðið frá Netflix vel fjármagnað og bjóði hluthöfum betri kjör til langs tíma. Í bréfi til hluthafa Warner Bros ítrekaði Netflix afstöðu sína um að tilboð sitt í Warner Bros feli í sér skýrar stoðir fjármögnunar og minni eftirlitsáhættu. Í fréttinni segir að Paramount geti enn komið með annað tilboð.

Það er talsverður munur á tilboðum Netflix og Paramount samkvæmt fréttinni. Netflix vill, til dæmis, kaupa kvikmyndaver Warner Bros og HBO streymisþjónustu þess, sem myndi einnig veita því aðgang að safni Warner Bros og tryggja áskrifendum aðgang að öllum kvikmyndum og þáttum. Netflix vill ekkert með sjónvarpsstöðvar Warner Bros hafa sem þýðir að Warner Bros myndi þurfa að finna annan kaupanda fyrir sjónvarpsstöðvarnar, sem eru til dæmis CNN og TNT, áður en Netflix tekur yfir fyrirtækið.

Paramount vill aftur á móti kaupa Warner Bros í heild sinni, sem myndi þýða að eignast sjónvarpsstöðvar sem þau eru í samkeppni við í dag, CBS, MTV og Showtime. Nýr eigandi Warner Bros myndi fá verulegt forskot á markaði með því að fá aðgang að risastóru kvikmynda- og sjónvarpsþáttasafni Warner Bros. Í safninu sé til dæmis að finna Harry Potter, MonsterVerse, Friends og HBO Max-streymisþjónustuna.

Í frétt BBC segir að samruninn geti vakið spurningar um minna val fyrir neytendur í afþreyingu. Búist er við að yfirtaka á Warner Bros verði rannsökuð af samkeppniseftirlitum í Bandaríkjunum og Evrópu. Ýmsir í kvikmyndaiðnaðnum hafa gagnrýnt áform Warner Bros um samrunann. Rithöfundasamband Bandaríkjanna krafðist þess til dæmis að samruninn yrði stöðvaður og vísaði til þess að hann myndi leiða til lægri launa og fækkunar starfa.