Olíu­birgðir að klárast og krísa lík­leg

Yfirvöld heimsins hafa ekki lengur svigrúm til að koma til móts við versnandi framboð í heiminum, eins og hægt var að nota þegar ástandið byrjaði að versna verulega þegar stríð Bandaríkjanna gegn Íran hófst í febrúar.

Wall Street Journal hefur eftir Mike Wirth, yfirmanni bandaríska olíufyrirtækisins Chevron, að svigrúmið sé nánast ekkert. Hann segir erfitt að segja til um hvert olíuverð muni fara á næstunni en verulega ólíklegt sé að það muni lækka.

Aðrir sérfræðingar sem rætt var við vara við því að raunveruleg hætta sé á því að ástandið verði stjórnlaust, ef svo má segja.

Tunnan líklega yfir 120 dali

Reuters hefur eftir greinendum Goldman Sachs að líkur séu á því að Brent-hráolían, sem gjarnan er notuð sem heimsviðmiðið, geti farið yfir 120 dali á tunnu. Hún stendur nú, þegar þetta er skrifað, í um 108 dölum eftir gífurlega hækkun í þessum mánuði.

Í byrjun ársins var verðið í um sextíu dölum á tunnu, eins og sjá má hér.

Það að verð hafi ekki hækkað meira fyrr á árinu en það hefur gert síðan stríðið hófst má að miklu leyti rekja til Kína. Ráðamenn þar ákváðu að draga verulega úr kaupum á olíu og fóru þess í stað að nota umfangsmiklar birgðir sem þeir höfðu safnað í gegnum árin. Birgðirnar voru notaðar fyrir um það bil helming daglegrar notkunar í Kína en ríkið er stærsti innflytjandi olíu í heiminum.

Þetta hafði þau áhrif að létta á mörkuðum en var alltaf tímabundin lausn á stærra vandamáli. Kínverjar eru nú byrjaðir að kaupa aftur olíu í miklu magni, samkvæmt greinendum sem ræddu við WSJ.

Kostnaðurinn við að ráða olíuflutningaskip til að flytja olíu frá Sádi-Arabíu til Kína hefur rokið upp í á undanförnum dögum. Verðið fór upp fyrir milljón dala á dag en fyrir ári var það undir hundrað þúsund dölum, samkvæmt pistlahöfundi Bloomberg um orkumál.

Hráolía berst ekki til Evrópu

Sádar eru sagðir hafa sent þau skilaboð til viðskiptavina sinna í Evrópu að líkur séu á því að evrópskar olíuvinnslur fái ekki þá hráolíu sem von var á á næstunni.

Sjá einnig: Sádar í slæmri stöðu en Trump kennir Selenskí um

Ástandið þykir sérstaklega slæmt hvað varðar díselolíu en verulega hefur dregið úr framleiðslu hennar að undanförnu vegna átakanna í Mið-Austurlöndum og árása Úkraínumanna á olíuvinnslur í Rússlandi.

Reuters segir til að mynda að í þessum mánuði sé búið að draga verulega úr framleiðslu díselolíu, eða stöðva hana alfarið, í þremur af sex stærstu díselvinnslum Rússlands. Árásir Írana á vinnslur í Mið-Austurlöndum hafa einnig komið verulega niður á framleiðslu þar.

Donald Trump, forseti Bandaríkjanna, hefur krafist þess að Úkraínumenn hætti árásum á díselvinnslur í Rússlandi. Úkraínumenn vilja að Rússar hætti í staðinn árásum á orkuinnviði í Úkraínu.

Trump lýsti því svo yfir í gær að ráðamenn beggja ríkja hefðu samþykkt að hætta árásum á orkuinnviði. Það samkomulag var þó ekki raunverulegt.