Borgarsögusafn gagn­rýnir rang­færslur varðandi Holts­götu 10

Í greinargerðinni er sagt að samkvæmt húsakönnun hafi húsið, sem til stendur að rífa, miðlungs varðveislugildi. Hið rétta er, segir í athugasemdum Borgarsögusafns, að húsið var metið með hátt varðveislugildi. Þá segir að sömu rangfærslu sé að finna í gögnum sem lögð voru fyrir Umhverfis- og skipulagsráð í haust og í bókun borgarráðsfulltrúa skömmu síðar.

Á lóðunum stendur til að reisa fjölbýlishús en þær hugmyndir hafa verið gagnrýndar af íbúum á svæðinu og minnihlutanum í Borgarstjórn.

Einnig er fundið að því að á uppdrætti skipulagstillögunnar er merkingum ábótavant því hvorki sé þar gerð grein fyrir verndarstöðu húsa á viðkomandi lóðum, né svokallaðri hverfisvernd sem sé í gildi einnig á svæðinu. Borgarsögusafn mælist því til þess að texti greinargerðarinnar verði leiðréttur og að gerð verði grein fyrir verndarstöðu húsanna á uppdrætti skipulagstillögunnar.