„Væntingar um hraðari lækkun vaxta hafi aukist“

Greint var frá óvæntri hjöðnun verðbólgu á fimmtudag eftir að Hagstofan birti mælingar á vísitölu neysluverðs fyrir nóvembermánuð. Verðbólgan hjaðnaði um 0,6 prósentustig milli mánaða og mælist nú 3,7 prósent. Hún hefur því ekki verið minni síðan í desember 2020.

„Þetta er mjög gleðilegt. Að einhverju leyti getum við sagt að við höfum átt von á að sjá svona tölur. Kannski ekki alveg svona stórar en það er auðvitað þannig að það hefur verið kólnun á vinnnumarkaði, ákveðin áföll riðið yfir. Kólnun á fasteignamarkaði þannig að þetta hlaut að koma fram fyrir rest,“ segir Daði Már Kristófersson fjármála- og efnahagsráðherra. 

„En við verðum svo að bíða og sjá hvernig vindur fram. Það verður mjög spennandi að sjá hvernig næsta miðlun kemur út.“

Verkalýðsforingjar hafa kallað eftir því að peningastefnunefnd Seðlabanka Íslands komi saman á aukafundi og lækki stýrivexti. Næsti fundur nefndarinnar er ekki á dagskrá fyrr en í febrúar. Stýrivextir eru nú 7,25 prósent.

„Það er auðvitað Seðlabankans að taka ákvörðun um það. Ég held að þeir eins og ég kannski vilji sjá næstu tölu áður en næstu skref eru tekin. Ég held að við hljótum samt að segja að væntingar um hraðari lækkun vaxta hafi aukist.“

Viðskiptabankarnir hafa á undanförnum vikum kynnt nýtt lánaframboð í kjölfar mikillar óvissu vegna dóms Hæstaréttar í vaxtamálinu svokallaða. Daði hefur ekki áhyggjur af því að ný lánaleið dragi úr taumhaldi peningastefnunefndar.

„Raunar er ég þeirrar skoðunar að það sé jákvætt að kaupendum fasteigna bjóðist fleiri möguleikar. Kannski eina sem ég myndi hafa áhyggjur af og það er bara almennt er að það sem er raunverulega til boða sé neytendum skiljanlegt, að þeir skilji hvaða samninga þeir eru að ganga inn í,“ segir Daði Már.