Körfubolti

Doncic skoraði 35 stig gegn Dallas

Ingvi Þór Sæmundsson skrifar
Leikmennirnir sem skiptu um félög í einum frægustu leikmannaskiptum í sögu NBA-deildarinnar. Luka Doncic fór til Los Angeles Lakers á meðan Anthony Davis fór til Dallas Mavericks. Flestir telja að Dallas hafi orðið á stór mistök þegar félagið skipti Doncic í burtu.
Leikmennirnir sem skiptu um félög í einum frægustu leikmannaskiptum í sögu NBA-deildarinnar. Luka Doncic fór til Los Angeles Lakers á meðan Anthony Davis fór til Dallas Mavericks. Flestir telja að Dallas hafi orðið á stór mistök þegar félagið skipti Doncic í burtu. getty/Ronald Martinez

Luka Doncic mætti gamla liðinu sínu þegar Los Angeles Lakers sigraði Dallas Mavericks, 129-119, í NBA-deildinni í körfubolta í nótt.

Sem frægt var skipti Dallas Doncic til Lakers í febrúar í staðinn fyrir Anthony Davis.

Sá síðarnefndi sneri aftur á völlinn í nótt eftir að hafa misst af fjórtán leikjum vegna kálfameiðsla. Davis fékk góðar móttökur hjá áhorfendum í Los Angeles en hann átti stóran þátt í því að Lakers varð meistari fyrir fimm árum.

Davis lék í 28 mínútur, skoraði tólf stig, tók fimm fráköst og gaf fimm stoðsendingar.

Doncic skoraði hins vegar 35 stig og gaf ellefu stoðsendingar fyrir Lakers. Austin Reaves var stigahæstur hjá liðinu með 38 stig en hann hefur spilað sérlega vel á tímabilinu. Reaves hitti úr tólf af fimmtán skotum sínum í leiknum í nótt.

Allir í byrjunarliði Lakers skoruðu þrettán stig eða meira. Sigurinn í nótt var sá sjötti í röð hjá liðinu en það er nú öruggt með heimaleik gegn San Antonio Spurs í átta liða úrslitum bikarkeppni NBA-deildarinnar.

Lakers er í 2. sæti Vesturdeildarinnar með fjórtán sigra og fjögur töp en Dallas er í fjórtánda og næstneðsta sæti með fimm sigra og fimmtán töp.

NBA



Fleiri fréttir

Sjá meira


×