Hörður og Svala endur­vekja Macland

Hörður greinir frá þessu á bæði Facebook og X.

„Eftir að samfélagsmiðlar Macland vöknuðu úr rúmlega árslöngu (þ)roti hef ég fengið gríðarlegt magn af skilaboðum um hvort þetta sé ég að pósta. Svarið er einfalt. Já. Þetta er ég,“ skrifar hann.

Hann rekur síðan hvernig hann stofnaði Macland með eiginkonu sinni, Svölu Hjörleifsdóttur, árið 2009 á Vífilsgötu í Reykjavík þar sem þau voru frameftir nóttu með tvö ungabörn að gera við tölvur.

„Stuttu síðar hófum við sölu á Apple vörum og fengu fyrstu viðskiptavinirnir valkost um að sækja pantanir á heimili okkar á Vífilsgötu eða fá heimsendingu þar sem ég mætti með GSM posa til þeirra.“

Áfall, brotthvarf og gjaldþrot

Hermann Fannar Valgarðsson, vinur Harðar, bættist í hópinn árið 2010 og úr varð fyrsta verslun Macland sem opnuð var 21. desember 2010 í gamla Sirkushúsinu við Klapparstíg 30. 

„Hermann Fannar lést árið 2011 og varð hans skarð aldrei bætt að fullu en orkan, hugmyndirnar og framkvæmdagleðin varð eftir,“ skrifar Hörður í færslunni.

„Við tók tímabil þar sem Macland fluttist milli staðsetninga á Laugavegi, opnaði verslun í Hafnarfirði, lokaði verslun í Hafnarfirði, opnaði verslun í Kringlunni og rak verkstæði í Ármúla. Árið 2021 var það besta í sögu félagsins og öll vinnan sem ég hafði lagt á mig í rúman áratug var að fara að skila sér,“ skrifar hann.

En síðan tók lukkan að snúast.

„Seint árið 2021 og snemma árs 2022 urðu miklar breytingar hjá þáverandi rekstrarfélagi Macland sem endaði með því að ég hætti störfum og öllum afskiptum af félaginu,“ skrifar Hörður.

Sjá: Hörður hættir í Macland

Árið 2024 varð mikill bruni í Kringlunni og á fyrri hluta þessa árs 2025 var Makkland ehf. tekið til gjaldþrotaskipta. Síðan hafi Hörður endurheimt lénið og samfélagsmiðla fyrirtækisins.

„Þið, viðskiptaVINIR Macland eruð hér enn“

„Hvert einasta skref sem við tókum frá árinu 2009 var lærdómsríkt og það leikur enginn vafi í dag á því að sú reynsla að hafa byrjað á svona hráum grunni hafi átt stærstan þátt í að skapa þá ástríðu sem við berum í brjósti fyrir Maclandinu okkar,“ skrifar Hörður.

Meðbyrinn og hvatningin sem þeim hjónum hafi borist síðustu mánuði hafi verið ómetanleg. „En það sem hefur kannski komið mér mest á óvart eru samskiptin við birgjana sem ég byggði upp, bæði hérlendis og erlendis áður en ég hætti,“ skrifar hann.

„Það er falleg tilfinning sem hríslast um okkur þegar horft er til baka á fyrstu viðgerðina sem framkvæmd var á eldhúsborðinu á Vífilsgötunni. Allar hindranirnar, lærdómurinn, mistökin, tækifærin, og svo allar manneskjurnar sem tengdust okkur í gegnum Macland á árunum 2009- 2022 gerðu þetta allt að veruleika. Þið, viðskiptaVINIR Macland eruð hér enn. Fyrir það erum ég og Svala gríðarlega þakklát.“