Tyrkir pökkuðu Giannis og Grikkjum saman á leið í úr­slit

Fyrr í dag tryggði Þýskalandi sér sæti í úrslitum og mikil spenna var fyrir leik kvöldsins. Fyrir fram var búist við nokkuð jöfnum leik en annað kom á daginn. Tyrkland mætti mun tilbúnara til leiks og keyrði yfir Grikkina frá fyrstu mínútu.

Munurinn var tíu stig eftir 1. leikhluta og 18 stig í hálfleik, staðan þá 49-31. Tyrkirnir bættu einfaldlega bara við í síðari hálfleik og unnu á endanum leikinn með 28 stiga mun, lokatölur 94-68.  Tyrkland er því á leið í sinn fyrsta úrslitaleik í 24 ár.

Ercan Osmani var magnaður í liði Tyrklands með 28 stig, sex fráköst og tvær stoðsendingar. Þar á eftir kom Cedi Osman með 17 stig , þrjú fráköst og tvær stoðsendingar. Alperen Şengün skoraði svo 15 stig, tók 12 fráköst og gaf sex stoðsendingar.

Í liði Grikklands var Giannis með aðeins 12 stig ásamt því að taka 12 fráköst og gefa fimm stoðsendingar. Kostas Sloukas var svo stigahæstur Grikkja með 15 stig ásamt því að gefa fjórar stoðsendingar og taka þrjú fráköst.