Nýtti glugga þegar hann opnaðist og þurfti ekki að kaupa fyrir­tækið til baka

„Þetta er alveg svakalega stór breyting. Ég er mjög spenntur. Við erum búin að vera undanfarna mánuði að vinna í þessu,“ segir Haraldur í samtali við Vísi en tilkynnt var um það í gær að fyrirtækið væri mætt aftur með Halla í brúnni.

„Ég fékk þegar ég seldi fyrirtækið, þá var ég með fjögurra ára glugga þar sem ég mátti ekki stofna það aftur, en svo mátti ég núna stofna það aftur,“ segir Haraldur.„Þetta er sama félag, þetta var bara mjög einfalt að ýta á on.“

Sala fyrirtækisins til Twitter vakti töluverða athygli á sínum tíma en um var að ræða gríðarstór viðskipti á mælikvarða íslenskra nýsköpunarfyrirtækja. Kaupverðið hefur ekki verið gefið upp en talið er að það hafi hlaupið á milljörðum króna.

Vinnur í að fá fleira fólk til baka

Á heimasíðu hins endurvakta félags segir að Ueno hafi gengið til liðs við Twitter 2021 til að leiða nýsköpun en í ár hafi það opnað aftur sem sérhæft ráðgjafafyrirtæki sem vinnur með fáum, vandlega völdum viðskiptavinum sem séu leiðandi á sínu sviði.

„Þetta er að stórum hluta mikið af sama fólkinu en fólk er auðvitað komið í allar áttir. En ég er svona að vinna í því að reyna að fá sem flesta til baka,“ segir Haraldur.

Fyrirtækið hafi aldrei verið beint með höfuðstöðvar neins staðar, heldur skrifstofur hér og þar og hann væntir þess að svo verði áfram. Fyrirtækið stofnaði Haraldur upphaflega í íbúðinni sinni í Reykjavík 2014 en það óx hratt og er nú aftur starfandi undir stjórn Haraldar.