„Ein besta manneskja sem ég hef kynnst“

Martin sat fyrir svörum ásamt Craig Pedersen á blaðamannafundi eftir einkar svekkjandi tap Íslands fyrir Póllandi á EM í körfubolta í gær. Tryggvi var lang besti leikmaður Íslands í leiknum og Martin stóð ekki á svörum þegar hann var spurður út í stóra manninn í gær.

„Ég held að allir sjái hans tölur með landsliðinu á mótinu. Hann er einstakur gæi. Ég hef spilað með mörgum stórum gaurum á mínum ferli en hann er ein besta manneskja sem ég hef kynnst,“ sagði Martin á fundinum og bætti við:

„Hann þreytist ekki. Spilar 39 mínútur í þessum leik og er enn að öskra að áhorfendum og enn á fullu gasi. Hann er okkar mikilvægasti leikmaður og ég segi liðum í EuroLeague að hundsa hann ekki, því að hann væri fullkominn fyrir öll lið þar. Hann er að bæta sig á hverju ári. Hann er týpan sem gerir allt rétt. Það skiptir engu máli hvort hann snerti boltann 30 sinnum eða tvisvar í leik – hann er alltaf til staðar og alltaf jákvæður. Þú getur ekki beðið um meira.“

Miklar tilfinningar fylgdu leik gærdagsins þar sem Ísland kastaði frá sér sigrinum. Stuðningsmenn Íslands eignuðu sér þá höllina í leiknum við Belga, en því miður dugði það skammt. Martin segir stuðninginn hafa mikla þýðingu.

„Þetta hefur alla þýðingu fyrir okkur. Að sjá allt þetta fólk koma hingað til Póllands að sjá mann spila. Það er erfitt að koma því í orð, allir vinir þínir og fjölskylda í stúkunni. Líka frá mér séð, þetta er tilfinningaþrungið, að sjá þetta fólk hér. Hafandi spilað erlendis í áratug að sjá fjölskylduna hér, fólk sem fær ekki tækifæri til að sjá mig ekki spila oft. Ég fæ gæsahúð við að sjá þau syngja þjóðsönginn í stúkunni,“

„Þetta er eitthvað sem alla frá Íslandi dreymir um, og vonandi getum við gefið þeim sigur því þau eiga það virkilega skilið,“ segir Martin.

Blaðamannafundinn má sjá í spilaranum. Martin tjáir sig um Tryggva eftir rúmlega fimm mínútur.